ბიძინა ივანიშვილის განცხადებით, სატელიტური ანტენების დარიგება განახლდება. ამის შესახებ „ქართული ოცნების“ ლიდერმა ახალციხეში მიმდინარე აქციაზე სიტყვით გამოსვლისას განაცხადა.

მისი თქმით, აშშ-ს სახელმწიფო მდივნის მოადგილისა და სხვა ევროპელი ლიდერების მკაცრი გაფრთხილების შემდეგ ხელისუფლებამ ყადაღა მოხსნა ანტენებს.

„ამერიკელებმა მკაფიოდ განაცხადეს, რომ ისინი არა რომელიმე პარტიას და მის ლიდერს არამედ ქართველ ხალხს უჭერენ მხარს. მათ სააკაშვილზე ყველაფერი იციან. სწორედ მათი მკაცრი ტონის შედეგად ინკასო მოეხსნა კოალიციაში შემავალი პარტიების ანგარიშებს. ჩემი და კახა კალაძის მიმართ იძულებითი აღსრულება გადაიდო, აუქციონზე არ გასულა ჩვენი მხარდამჭერების ქონებაც, აქედან გამომდინარე სააკაშვილისთვის უცხოელების აზრი მნიშვნელოვანია“,- განაცხადა ბიძინა ივანიშვილმა.

ივანიშვილმა აშშ-ს სახელმწიფო მდივნის ვიზიტი გაიხსენა და მის განცხადებაზე დაყრდნობით, რომ ამერიკა მხარს არა ლიდერებს, არამედ ქვეყნის დემოკრატიულ განვითარებას უჭერს, განაცხადა რომ ამერიკა ხელისუფლების მშვიდობიან გადაბარებას ელოდება.

internet.ge