საპარლამენტო უმრავლესობის წევრი გიგი წერეთელი მიიჩნევს, რომ სახალხო დამცველის ანგარიშებზე ადექვატური რეაგირება რომ ყოფილიყო, შემზარავი ფაქტები არ მოხდებოდა.

როგორც „ინტერნეტ.ჯი“–ს პატიმრების წამების შემზარავ ფაქტებთან დაკავშირებით წერეთელმა განუცხადა, ამ მძიმე ფაქტებმა, პენიტენციალურ სისტემაში წინ გადადგმულ ნაბიჯებს ჩრდილი მიაყენა.

მისი თქმით, პატიმართან ფაქიზი მიდგომაა საჭირო და არა მათი ცემა.

„მკაცრი იქნება ის სასჯელები, რომლებიც ამ დანაშავე პირებს დაეკისრებათ. რაც შეეხება პოლიტიკურ პასუხისმგებლობას, მინისტრმა დაკავებული თანანმდებობა დატოვა, რადგან ის ბევრ რამეზე პასუხისმგებელი იყო. ბუნებრივია, პასუხისმგებლობა უმრავლესობასაც აქვს. შეიძლება სხვა პოლიტიკურ ძალებსაც, თუმცა, განსაკუთრებით ხელისუფლებას, რის გამოც, მმართველმა ძალამ, ამ ფაქტების გამომზეურების შემდეგ, მკაცრი გადაწყვეტილებები მიიღო. ამ ყველაფრის მიუხედავად, გეთანხმებით, რომ მეტი აქტივობა იყო საჭირო და სახალხო დამცველის ანგარიშის საფუძველზე, მთავრობისთვის მეტი რეაგირება უნდა მოგვეთხოვა. ომბუდსმენის ანგარიშზე, განსაკუთრებული აქცენტი სასჯელაღსრულების უწყებას უნდა გაეკეთებინა. მართალია, პენიტენციალური სისტემა ღია არ არის, მაგრამ  კონტროლის მექანიზმები გამოყენებული უნდა ყოფილიყო, რომ ასეთი ფაქტები არ მომხდარიყო. თითოეული ჩვენთაგანი ამ პასუხისმგებლობას იზიარებს, რადგან ამ ფაქტების თავიდან აცილება შეიძლებოდა  თუ რეაგირება დროული იქნებოდა. ასეთი ტიპის დანაშაულები ცივილიზებულ ქვეყნებშიც არის, მაგრამ ეს არ გვამშვიდებს, რადგან ეს ჩვენი ქვეყანაა, ჩვენი ადამიანები არიან და ჩვენი მეგობრები. მორალურად პატიმარს ყოფნა ისედაც მძიმე პირობებში უწევს, რაც არ უნდა კომფორტული საკანი იყოს. შესაბამისად, მათი დამცირება და ცემა კატეგორიულად მიუღებელია. ფაქტია, რომ ეს სისტემა ცვლილებებს საჭიროებს“, – განაცხადა წერეთელმა.

Internet.ge