რუსეთის საგარეო საქმეთა სამინისტრო გამოეხმაურა აშშ-ს სახელმწიფო დეპარტამენტის ანგარიშს, რომლის მიხედვითაც, საქართველოში და მოლდოვაში რუსეთის ჯარები უკანონოდ იმყოფებიან.

ანგარიში „2010, შეიარაღების, გაუვრცელებლობისა და განიარაღების სფეროებში შეთანხმებებისა და ხელშეკრულებების დაცვის შესახებ" აშშ-ს სახელმწიფო დეპარტამენტმა დღეს გაავრცელა. ანგარიშში ასახულია უცხოური სახელმწიფოების მიერ ზემოზსენებული შეთანხმებების დაცვის ანალიზი 2004 წლის 1 იანვრიდან 2008 წლის 31 დეკემბრამდე.

ანგარიშის მიხედვით, საქართველოში და მოლდოვაში რუსეთის ჯარები ამ სახელმწიფოების ნებართვის გარეშე იმყოფებიან.

რუსეთის საგარეო უწყებამ აშშ-ს სახელმწიფო დეპარტამენტი არაკორექტულობაში დაადანაშაულა და განაცხადა, რომ არც ერთი რუსი ჯარისკაცი საქართველოში არ იმყოფება.

„სამხრეთ ოსეთი და აფხაზეთი კი, რომელთა ტერიტორიებზეც რუსული ბაზებია განთავსებული, საქართველოს შემადგენელი ნაწილები არ არიან", - აღნიშნულია რუსეთის საგარეო საქმეთა სამინისტროს განცხადებაში.

რაც შეეხება მოლდოვას, სამინისტროს მტკიცებით, დნესტრისპირეთში რუსეთის სამშვიდობო ძალები მოლდოვას თანხმობის საფუძველზე, 1992 წლის 21 ივლისს განთავსდნენ.

„მედიანიუსი"