ურეკში სარეაბილიტაციო ცენტრი გაიხსნა. ახლადაშენებული “ურეკის სარეაბილიტაციო ცენტრის“ გახსნას ოზურგეთის მაჟორიტარი დეპუტატობის კანდიდატი რამაზ ნიკოლაიშვილი და იაპონიის საგანგებო და სრულუფლებიანი ელჩი საქართველოში მასაიოში კამოჰარა დაესწრო.

სარეაბილიტაციო ცენტრის სამსართულიანი შენობა, რომელიც აშენდა, სრულად გარემონტდა და შესაბამისი ტექნიკით აღიჭურვა, გურიის რეგიონის ინვალიდთა ასოციაციის მიერ წარდგენილი პროექტის საფუძველზე „გრასრუტებისა და ადამიანთა უსაფრთხოების პროექტების“ ფარგლებში დაფინანსდა.

გურიის რეგიონის ინვალიდთა ასოციაცია 1992 წელს შეიქმნა და მათი ერთადერთი სარეაბილიტაციო ცენტრი ურეკში, ამორტიზებული კოტეჯი იყო, სადაც მიუხედავად მოთხოვნისა, სეზონურად მხოლოდ 50 ადამიანი ახერხებდა კურსის გავლას, თუმცა მათი რეაბილიტაციისთვის სათანადო პირობები არ არსებობდა. 

ახალ სარეაბილიტაციო ცენტრში სარეაბილიტაციო კურსის გავლა მთელი წლის განმავლობაში იქნება შესაძლებელი, ერთდროულად აქ 50 ადამიანი გაივლის კურსს და მათთვის 30 კაციანი პერსონალი იმუშავებს, გურიის ინვალიდთა ასოციაციაში ამბობენ, რომ წლის განმავლობაში შესაძლებელი გახდება მინიმუმ 750 ადამიანმა გაიაროს სრული სარეაბილიტაციო კურსი.

internet.ge