კომპანია „თელასის“ კომერციული დირექტორი ზურაბ არსოშვილი აცხადებს, რომ მთაწმინდა-კრწანისის რაიონული ბიზნესცენტრის თანამშრომლები ჩვეულ რეჟიმში განაგრძობენ მუშაობას, მისივე განცხადებით, გაფიცული ადამიანების დიდმა ნაწილმა სამსახური რამდენიმე თვის წინ, საკუთარი სურვილით დატოვა.

როგორც „ინტერნეტ.ჯი“-ს არსოშვილმა განუცხადა, აღნიშნული პიროვნებები ქვეყანაში განვითარებულ პოლიტიკურ პროცესების საკუთარ თავზე მორგებას ცდილობენ.

„ამ ადამიანების სამსახურიდან გათავისუფლება უკანონოდ არ მომხდარა. როდესაც ახალი მენეჯმენტი დაინერგა და კომპანიამ კორუფციული სისტემის წინაამდეგ ბრძოლა დაიწყო, ბევრმა მათგანმა სამსახურიდან წასვლის გადაწყვეტილება თავად მიიღო. ზოგიერთი მათგანი კი კანონის სრული დაცვით გათავისუფლდა, რადგან ე.წ „ლევი“ მიბმების არსებობა დაფიქსირდა“,- განაცხადა არსოშვილმა და იქვე დასძინა, რომ ჯგუფი, რომელიც ყველაზე მეტად აქტიურობს, პოლიტიკურად ანგაჟირებულია.

„ქალბატონი ნინო, რომელიც პრესასთან საუბრობს იმაზე თუ რა რთულ პირობებში მუშაობდა ‘’თელასში", თავის დროზე ყველას უცხადებდა, რომ  „ერთიანი ნაციონალური მოძრაობის“ მხარდამჭერი იყო, ახლა, რადგან ქვეყანაში სიტუაცია შეიცვალა, მათი პოლიტიკური სიმპატიებიც კონკრეტული პარტიის მისამართით გადიხარა. ეს არის კომპანია, სადაც პარტიული სიმპატიებისთვის არავის აწინაურებენ. ამასთან, მინდა აღვნიშნო, რომ ქალბატონი ნინოს და - თამუნა კილაძე „თელასში“ დღემდე ასრულებს დაკისრებულ მოვალეობას“,- აცხადებს არსოშვილი.

კომერციული დირექტორი გაფიცულთა მოთხოვნას, რომლის მიხედვითაც ისინი პროკურატურაში სარჩელის შეტანას აპირებენ მიესალმება და ახადებს, რომ მზადაა სამართალდამცავებს დაუმტკიცოს, რომ აღნიშნული ჯგუფი ძველი მენეჯმენტის დროს სახელმწიფოს წინააღმდეგ კორუფციულ საქმეებს ჩადიოდა.

„თელასის“ ყოფილმა თანამშრომლებმა დღეს "ქართული ოცნებას" განცხადებით მიმართეს. ისინი აცხადებენ, რომ  გაფიცვა არის ერთგვარი სოლიდარობა მათ მიმართ.

"ისინი უკმაყოფილოები არიან იმ მმართველობის ფორმით, რაც დამკვიდრდა ზურაბ არსოშვილის მოსვლის შემდეგ. მათ აძლევენ გაურკვეველ დავალებებს და ეს არის ერთგვარი სოლიდარობა ასევე ჩვენს მიმართ, რომლებიც უკანონოდ ვართ გათავისუფლებული სამსახურიდან", - განაცხადა "თელასის" ყოფილმა თანამშრომლემა ეკა თიკარაძემ.

ყოფილი თანამშრომლების მთავარი მოთხოვნა შრომის შესაბამის ანაზღაურებაა.

internet.ge