სასჯელაღსრულების სამინისტრო სამკურნალო დაწესებულებაში 39 წლის პატიმარის გარდაიცვალების შესახებ ინფორმაციას ავრცელებს.

სამინისტროს ინფორმაციით, 2012 წლის 1-ელ ნოემბერს, დილის 05:20 საათზე, №18 მსჯავრდებულთა და ბრალდებულთა სამკურნალო დაწესებულებაში გარდაიცვალა 1974 წლის 23 მაისს დაბადებული მსჯავრდებული გ.თ.

„№18 მსჯავრდებულთა და ბრალდებულთა სამკურნალო დაწესებულებაში პატიმარი 2012 წლის 6 სექტემბერს, ქსნის #19 ტუბ. დაწესებულებიდან გადაიყვანეს. დიაგნოზით - ფილტვების ტუბერკულოზი, მგბ(+) დადებითი; პიოდერმია; აივ ინფექცია შიდსი სტადია 3; ქონიკული C ვირუსული ჰეპატიტი, ტოქსიური ჰეპატიტი, ღვიძლის უკმარისობა; ნაადრევი ფარული ხანის ათაშანგი.

სამკურნალო დაწესებულებაში პაციენტი მოთავსდა ინფექციურ განყოფილებში. მდგომარეობის დამძიმების შემდეგ, კი გადაყვანილი იქნა ანესთეზია-რეანიმაციისა და ინტენსიური თერაპიის განყოფილებაში, სადაც ჩაუტარდა რეანიმაციული ღონისძიებები. მიუხედავად სამედიცინო დახმარებისა, სამწუხაროდ პატიმრის სიცოცხლის გადარჩენა ვერ მოხერხდა.

გარდაცვალების წინასწარი დიაგნოზი: სუნთქვისა და გულ-სისხლძარღვთა მწვავე უკმარისობა.

აღნიშნული ფაქტის შესახებ უკვე ინფორმირებული არიან გარდაცვლილი პატიმრის ოჯახის წევრები.

სამინისტრო ღრმა მწუხარებას გამოხატავს პატიმრის გარდაცვალების ფაქტის გამო და უსამძიმრებს გარდაცვლილის ოჯახის წევრებსა და ახლობლებს.

გარდაცვალების ფაქტის გამომწვევი მიზეზების დადგენის მიზნით, მიმდინარეობს გამოძიება, დანიშნულია ექსპერტიზა“,- აღნიშნულია სამინისტროს განცხადებაში.

internet.ge