საფრანგეთის ახალი პრეზიდენტის პირველი საზღვარგარეთული ვიზიტი მცირე შეფერხებით დაიწყო. ფრანსუა ოლანდის თვითმფრინავს მეხი დაეცა. ინცინდენტი ფრენის მეოთხე წუთზე მოხდა. პრეზიდენტი ბერლინში მიფრინავდა, თუმცა იძულებული გახდა ისევ პარიზში დაბრუნებულიყო და სხვა თვითმფრინავში გადამჯდარიყო. როგორც BFM TV იუწყება, პრეზიდენტის თვითმფრინავს მეხის დაცემის გამო სერიოზული დაზიანებები არ მიუღია.

თავისი პირველი გასვლითი ვიზიტისთვის ოლანდმა ლაინერი Falcon 7X აირჩია. პრეზიდენტის ადმინისტრაციის განკარგულებაში ორი ასეთი თვითმფრინავია, რომლებიც 2009 და 2010 წლებში შეიძინეს. მედიამ ერთ-ერთს Carla One უწოდა, ყოფილი პირველი ლედის - კარლა ბრუნის სახელი, უფრო მასშტაბურ ლაინერს კი Air Sarko One.

შეფერხების მიუხედავად, ფრანსუა ოლანდი ბერლინში გუშინვე ჩაფრინდა და უკვე გამართა კიდეც შეხვედრა გერმანიის კანცლერთან. რადიო „თავისუფლების“ ცნობით, მათი საუბრის თემა ევროპის პოლიტიკური ვითარება და საბერძნეთის კრიზისი იყო. მერკელმა შეხვედრის შემდეგ განაცხადა, რომ ორივე ლიდერს სურს საბერძნეთი ევროპის ზონაში დარჩეს. ოლანდმა კი იმედი გამოთქვა,  რომ მომავალ არჩევნებში, ბერძნები ევროზონას დაუჭერენ მხარს.

როგორც საფრანგეთის პრეზიდენტმა განაცხადა, მისი და ანგელა მერკელის  სურვილია, რომ გერმანიამ და საფრანგეთმა ევროპის კეთილდღეობისთვის ითანამშრომლონ.

Internet.ge