ნინოობის დღესასწაულთან დაკავშირებით, პარლამენტის თავმჯდომარე, დავით ბაქრაძე ფარავნის ტბასთან, ფოკის მონასტერში, წმინდა ნინოს საქართველოში შემოსვლის აღსანიშნავ წირვას დაესწრო.

პარლამენტის პრესსამსახურის ინფორმაციით, წირვის შემდეგ, ბაქრაძე იმ მომლოცველთა ჯგუფს შეხვდა, რომლებიც  წმინდა ნინოს  მიერ ქართლის გასაქრისტიანებლად განვლილ გზას ფეხით გადიან.

მათი ცნობით, პარლამენტის თავმჯდომარემ ნინოწმინდის რაიონის სოფელ სათხას მოსახლეობასთან შეხვედრაზე, რომლებიც ეთნიკურად სომეხი ეროვნების საქართველოს მოქალაქეებს წარმოადგენენ, ორი ერის მრავალსაუკუნოვან ურთიერთობებზე ისაუბრა და აღნიშნა, რომ ერთ სახელმწიფოში ორი მოძმე ერი საუკუნეების განმავლობაში მეგობრულად ცხოვრობენ.   

ამასთან, სამცხე-ჯავახეთში სტუმრობისას, პარლამენტის თავმჯდომარე ნინოწმინდის მოსახლეობასაც შეხვდა და ყურადღება ქვეყანაში მიმდინარე სოციალურ, ჯანდაცვის და დაზღვევის რეფორმებზე გაამახვილა.

მისი განცხადებით, სახელმწიფო საკუთარი ხარჯებით სექტემბერში ორ მილიონზე მეტ მოქალაქეს დააზღვევს, რომელიც ასაკით პენსიონერებს და ხუთწლამდე ბავშვებს ხელმისაწვდომი ჯანდაცვით უზრუნველყოფს.

შეგახსენებთ, რომ ნინოობის დღესასწაული ყოველი წლის 1 ივნისს 1989 წლიდან საქართველოს კათოლიკოს-პატრიარქის, უწმინდესის და უნეტარესის ილია მეორის ლოცვა-კურთხევით აღინიშნება. მსვლელობის მონაწილეები, რომლებიც წმინდა ნინოს  მიერ ქართლის გასაქრისტიანებლად განვლილ გზას ფეხით გადიან, საქართველოს ეკლესია-მონასტრებს ლოცვით შემოივლიან და მსვლელობას 13 ივნისს მცხეთაში დაასრულებენ.

Internet.ge