საქართველოს პარლამენტი, ოკუპირებულ აფხაზეთში, ისტორიული ძეგლების განზრახ დაზიანებასთან დაკავშირებით, დღეს განცხადებას მიიღებს.

პარლამენტის მიერ შემუშავებულ განცხადებაში ნათქვამია, რომ ქართული მხარე, ღრმა შეშფოთებას გამოხატავს, რუსეთის ფედერაციის მიერ ოკუპირებულ აფხაზეთში - მოქვის, ბედიისა და სხვა ქართულ ტაძრებზე, მიმდინარე უკანონო სამუშაოებთან დაკავშირებით.

“აღნიშნული სამუშაოების გამო, შუა საუკუნეების კულტურული მემკვიდრეობის ძეგლებს ზიანი ადგება. მსგავსმა „რესტავრაციამ“ უკვე გამოიწვია - ქართული კულტურული მემკვიდრეობის თვალსაჩინო ძეგლის, ილორის წმ. გიორგის მონასტრის დაზიანება და მასზე, ქართული კვალის წაშლა“, - აღნიშნულია განცხადებაში.

ქართული მხარე, საერთაშორისო თანამეგობრობას მოუწოდებს, რუსეთის საოკუპაციო რეჟიმს და აფხაზეთის მარიონეტულ მმართველობას კატეგორიულად  მოსთხოვოს - ოკუპირებული აფხაზეთის ტერიტორიაზე, კულტურული მემკვიდრეობის ძეგლებზე, მიმდინარე უკანონო სამუშაოები შეწყდეს და რეგიონში, იუნესკოსა და სხვა კომპეტენტური საერთაშორისო ორგანიზაციების ექსპერტები დაუშვან“, - ნათქვამია განცხადებაში.

შეგახსენებთ, რომ აფხაზეთის საოკუპაციო რეჟიმის ლიდერი, ალექსანდრე ანქვაბი ქართული კულტურული ძეგლებისთვის - ბედიის, მოქვისა და სხვა ტაძრებისთვის სარესტავრაციო სამუშაოების ჩატარების ინიციატივით გამოვიდა.

Internet.ge