რუსეთის საგამოძიებო კომიტეტი 9 საათის განმავლობაში ჩხრეკდა ოპოზიციის ლიდერების ბინებს. ჩხრეკის შედეგები სამართალდამცველებმა ოფიციალურად გააჟღერეს. 

„ოპოზიციის ლიდერების - ალექსი ნავალნის, სერგეი უდალცოვის, ილია იაშინის, ილია პონომარიოვის და ქსენია სობჩაკის ბინებიდან ამოღებულია დიდი რაოდენობის სააგიტაციო პროდუქცია და ლიტერატურა ანტისახელმწიფოებრივი ლოზუნგებით, მონაცემთა ელექტრონული ბაზა და კომპიუტერები, რომლებიც სისხლის სამართლის საქმისათვის მნიშვნელოვან ინფორმაციას შეიცავს. გარდა ამისა, უდალცოვისგან ამოიღეს პირთა სიები, რომლებიც მათ შეხედულებებს იზიარებენ - ე.წ. აქტივი“ - ნათქვამია საგამოძიებო კომიტეტის განცხადებაში.

იაშინისა და სობჩაკის ბინებიდან ამოღებულია „დიდი რაოდენობით ფული ევროპულ და ამერიკულ ვალუტაში, რომლებიც 100-ზე მეტ კონვერტშია განაწილებული (არანაკლებ 1 მილიონი ევრო). გამოძიება არკვევს ვალუტის მიღების წყაროს და იმას, თუ რა მიზნისთვის იყო ის განკუთვნილი“.

მანამდე კი გავრცელდა ინფორმაცია, რომ ქსენია სობჩაკის ბინიდან სამართალდამცველებმა 1,5 მილიონი ევრო ამოიღეს.

ყველა აღნიშნული პირი დღეს დილითვე დაკითხვაზეა გამოძახებული.

ოპოზიციონერები ამბობენ, რომ ეს პროცესები ხელს არ შეუშლის დღეს მოსკოვში დაგეგმილი „მილიონების მარშის“ ჩატარებას.

„ყველაფერი გეგმის მიხედვით წარიმართება. კორექტივა იქნება მხოლოდ ის, რომ გაიზრდება მონაწილეთა რაოდენობა. მაგრამ ეს ხელისუფლების ქმედების გამო მოხდება   - განუცხადა „ინტერფაქსს“ მსვლელობის ერთ-ერთმა ორგანიზატორმა მოძრაობა „სოლიდარნოსტის“ აქტივისტმა სერგეი დავიდსმა.

Internet.ge