შრომის, ჯანმრთელობისა და სოციალური დაცვის მინისტრმა ზურაბ ჭიაბერაშვილმა, საზღვარგარეთ მოღვაწე წარმატებულ ქართველ ექიმებს სახელმწიფო სერტიფიკატები გადასცა. სერტიფიკატები ექიმებს საქართველოს ტერიტორიაზე სხვადასხვა სპეციალობებით სამედიცინო საქმიანობის განხორციელების საშუალებას მისცემს.

ამგვარი წახალისებით, სამინისტრო ცდილობს ხელი შეუწყოს დასავლეთის ქვეყნებში მოღვაწე ქართველ ექიმებს ჩაერთონ ქართული ჯანდაცვის სექტორის განვითარებაში, დაამყარონ პროფესიული კავშირები და შეძლონ საკუთარი გამოცდილების გაზიარება ადგილობრივი კოლეგებისათვის.

ღონისძიება ჯანდაცვის სამინისტროს მიერ ორგანიზებული სამედიცინო კონფერენციის „მედეა 2012" ფარგლებში ჩატარდა, რომელიც ქ. ბათუმში მიმდინარეობს და 15 ივნისს იხურება. კონფერენციაში, რომელიც საქართველოს პრეზიდენტმა გახსნა, საქართველოს პირველი ლედი, პარლამენტის წევრები, სამედიცინო სფეროს, სადაზღვევო ინდუსტრიისა და ჯანდაცვის სამინისტროს წარმომადგენლები მონაწილეობენ.

„მედეა 2012“-ის მიზანია, დაისახოს ზუსტი კურსი საქართველოში ჯანდაცვის სისტემის მდგრადი განვითარებისთვის. ამერიკიდან, ევროპიდან, ისრაელიდან და სინგაპურიდან ჩამოსული დელეგატები ისეთ მნიშვნელოვან საკითხებზე მსჯელობენ, როგორიც ჯანდაცვის სფეროს განვითარება, უცხოეთში მოღვაწე ქართველი ექიმების ქართულ სამედიცინო სფეროში რეინტეგრაცია, ხარისხიანი და ხელმისაწვდომი სამედიცინო სერვისების შექმნა და ქვეყნის ჯანდაცვის სისტემაში ინვესტიციების მოზიდვაა.

internet.ge