გავრცელებული ინფორმაციით, საქართველოს ეროვნული საინვესტიციო სააგენტოს ყოფილი ხელმძღვანელი ქეთევან ბოჭორიშვილი ეკონომიკისა და მდგრადი განვითარების მინისტრის მოადგილის პოსტზეა წარდგენილი. 

საინიციატივო სააგენტო ბოჭორიშვილმა გუშინ დატოვა.

საკადრო გადაადგილების გადასამოწმებლად „ინტერნეტ.ჯი“ ეკონომიკის სამინისტროს პრესსამსახურის ხელმძღვანელ თეა ბოლქვაძეს დაუკავშირდა.

„მინისტრის მოადგილის ცვლილების შემთხვევაში მედიას ინფორმაციას მოგაწვდით. ბოჭორიშვილის კანდიდატურაზე ჯერჯერობით ვერაფერს გეტყვით. იცით, რომ ნებისმიერი კანდიდატი პრემიერ - მინისტრმა უნდა დაამტკიცოს“,- განაცხადა ბოლქვაძემ.

პარლამენტში გუშინ მიღებული გადაწყვეტილების თანახმად, ამიერიდან ეროვნულ საინვესტიციო სააგენტოს სამეთვალყურეო საბჭოს „საპარტნიორო ფონდის“ აღმასრულებელი დირექტორი - ნიკა გილაური უხელმძღვანელებს.

ასევე ვრცელდება ინფორმაცია შს მინისტრის მოადგილის, ამირან მესხელის თანამდებობიდან წასვლის შესახებ, სავარაუდოდ ის ვიცე-პრემიერის პოსტს დაიკავებს. 

ასევე გავრცელებული ინფორმაციით, დათა ახალაიას კანდიდატურა განიხილება თავდაცვის მინისტრის მოადგილის პოსტზე.

internet.ge