სახალხო დამცველი, სოციალურ ქსელ facebook-ში, „ქართული ოცნების“ წევრის, მურმან დუმბაძის მიერ, "რესპუბლიკური პარტიის ბათუმის საქალაქო ორგანიზაციის ხელმძღვანელის, გიორგი მასალკინის მისამართით გაკეთებულ განცხადებას გამოეხმაურა და გააკრიტიკა.

როგორც ტუღუშის მიერ გავრცელებულ განცხადებაში ნათქვამია, "25-ე არხის" ეთერში გასული გადაცემისას, მურმან დუმბაძემ, ეთნიკური წარმომავლობის საფუძველზე, გარკვეული ზღვარი გაავლო საქართველოს სხვა მოქალაქეებსა და ეთნიკური წარმოშობით ქართველებს შორის, რაც დისკრიმინაციული დამოკიდებულებაა.

სახალხო დამცველის განცხადებით, აღნიშნული ტიპის განცხადებების გაკეთებისაგან პოლიტიკურმა მოღვაწეებმა თავი უნდა შეიკავონ.  როგორც განცხადებაშია ნათქვამი, ამან შეიძლება ხელი შეუწყოს საზოგადოებაში შეუწყნარებლობის გაღვივებას, რაც საფრთხეს უქმნის სამოქალაქო ერთიანობას და შეურაცხყოფს არამარტო კონკრეტულ პიროვნებას, არამედ ზოგადად საქართველოს მოქალაქეების ღირსებას, ეწინააღმდეგება იმ ღირებულებებსა და მიზნებს, რომელთა დამკვიდრება საქართველოს მოქალაქეთა ურყევ ნებას წარმოადგენს და დეკლარირებულია საქართველოს კონსტიტუციის პრეამბულაში.

"ვთვლი, რომ მსგავსი განცხადება უაღრესად კრიტიკულ შეფასებას იმსახურებს ჩემგან, როგორც უფლებადამცველისგან, რადგან დაუშვებელად მიმაჩნია ეთნიკური წარმომავლობის რაიმე სახის პრობლემად წარმოჩენა. მინდა ვისარგებლო შემთხვევით და მოვუწოდო ყველა პოლიტიკურ ძალას, სამოქალაქო ორგანიზაციასა და მედიასაშუალებას, განსაკურებული ყურადღება გამოიჩინონ და მიიღონ სათანადო ზომები, რათა მათ მიერ, ან მათი მეშვეობით, სამომავლოდ არ მოხდეს დისკრიმინაციული გამონათქვამების, სიძულვილის ენისა და ქსენოფობიის ტირაჟირება“,- ნათქვამია სახალხო დამცველის მიერ გავრცელებულ განცხადებაში.

Internet.ge