საქართველოს საგარეო საქმეთა სამინისტრომ, ოკუპირებულ რეგიონებში რუსეთის ფედერაციის სახმელეთო ჯარების სარდლის, ვლადიმერ ჩირკინის ჩასვლასთან დაკავშირებით განცხადება გაავრცელა.

განცხადებაში ნათქვამია, რომ 11 და 13 ივლისს გენერალ-პოლკოვნიკი ვლადიმერ ჩირკინი, საქართველოს სახელმწიფო საზღვრის დარღვევით ჩავიდა რუსეთის მიერ ოკუპირებულ საქართველოს რეგიონებში - ცხინვალის რეგიონსა და აფხაზეთში, სადაც „ინსპექტირების" მიზნით, რუსეთის საოკუპაციო ძალების ე.წ. ბაზები მოინახულა და შეხვედრები გამართა საოკუპაციო რეჟიმების წარმომადგენლებთან.

„რუსეთი განაგრძობს საქართველოს ოკუპირებული ტერიტორიების ინტენსიურ მილიტარიზაციას, იქ განლაგებული საოკუპაციო ძალების გადაიარაღებას უახლესი სამხედრო ტექნიკით, მათ შორის, შეტევითი სარაკეტო შეიარაღების განლაგებას და დამრტყმელი სამხედრო დაჯგუფებების ფორმირებას. ამავე კონტექსტში უნდა იქნას განხილული 2008 წლის სცენარით მიმდინარე გამუდმებული სამხედრო წვრთნები როგორც ოკუპირებულ რეგიონებში, ასევე საქართველოს სახელმწიფო საზღვრის მთელ პერიმეტრზე, და 2012 წლის სექტემბერში დაგეგმილი სტრატეგიული სამხედრო სწავლებები „კავკასია-2012", რითაც რუსეთი უშუალო სამხედრო საფრთხეს უქმნის მშვიდობასა და სტაბილურობას საქართველოსა და მთლიანად შავი ზღვის რეგიონში,“ - ნათქვამია განცხადებაში.

საქართველოს საგარეო საქმეთა სამინისტროს ხედვით, სულ უფრო და უფრო ნათელი ხდება, რომ რუსეთის ფედერაციის სათავეში მყოფ რეჟიმს არაფერი აქვს შესათავაზებელი კავკასიისათვის, გარდა კრიმინალურ-მაფიოზური მმართველობისა და მილიტარიზაციისა. ეს რეალობა კი სერიოზული განსჯის საგანი უნდა გახდეს კავკასიის სახელმწიფოებისათვის, კავკასიის ხალხებისა და საერთაშორისო საზოგადოებისათვის.

Internet.ge