უკრაინელმა ფეხბურთელმა ანდრეი შევჩენკომ სპორტული კარიერის დასრულება და პოლიტიკაში წასვლა გადაწყვიტა. ამის შესახებ პირველი განცხადება მან გუშინ „დინამო“ – „ჰოვერლას“ მატჩის დასრულების შემდეგ გააკეთა.

დღეს კი უკრაინელი სპორტსმენი ნატალია კოროლევსკის პარტიას - „უკრაინა, წინ!“ შეუერთდა.

„მე მსურს საკუთარი ძალების რეალიზება პოლიტიკაში; მინდა იმ გამოცდილების გაზიარება, რომელსაც ევროპაში დავეუფლე; მსურს, რაღაც გავაკეთო ჩემი ქვეყნისთვის. მე ვუერთდები ნატალია კოროლევსკის პარტიას, რადგან „უკრაინა, წინ!“ - ეს მომავლის პარტიაა, ეს ახალგაზრდა ლიდერების პარტიაა, ესაა კონკრეტული არჩევანი წარსულსა და მომავალს შორის. პოლიტიკაში სოციალური სფეროსა და სპორტის მხარდაჭერას ვგეგმავ, ვინაიდან ჩემი მთავარი დევიზია - ჯანსაღ სხეულში ჯანსაღი სულია!“ - აღნიშნა ფეხბურთელმა.

კარიერის განმავლობაში შევჩენკო კიევის „დინამოს“ შემადგენლობაში 5-ჯერ გახდა უკრაინის ჩემპიონი, „მილანის“ მაისურით კი იტალიის პირველობა და ჩემპიონთა ლიგა მოიგო. 2004 წლის „ოქროს ბურთის“ მფლობელი 3-ჯერ ჩემპიონთა ლიგის ბომბარდირი გახდა, 2-ჯერ კი - იტალიის ჩემპიონატის. იგი 6-ჯერ აღიარეს უკრაინის საუკეთესო ფეხბურთელად.

ანდრეი შევჩენკოს ახლო ურთიერთობა აქვს ცოტა ხნის წინ პოლიტიკაში წასულ კახი კალაძესთან, რომელთან ერთადაც იტალიურ „მილანში“ გამოდიოდა. უკრაინელი ფეხბურთელი შემოდგომაზე საქართველოში, „ქართული ოცნების“ პრეზენტაციაზეც იმყოფებოდა.

Internet.ge