ტელეკომპანია "მაესტროს" სამეგრელოს რეგიონის ჟურნალისტი ნანა ფაჟავა სამეგრელოს მედია ორგანიზაციის გადამღებ ჯგუფს თავს დაესხა და კუთვნილი კამერა დაუზიანა.  აღნიშნული ინფორმაცია „ინტერნეტ.ჯი“-ს სამეგრელოს მედია ორგანიზაციის  რედაქტორმა მალხაზ ბასილაიამ დაუდასტურა.

ბასილაია აცხადებს, რომ ინცინდენტი მაშინ მოხდა, როდესაც დამოუკიდებელი ჟურნალისტები იმავე თემაზე მუშაობნენ, რაზეც თავად ნანა ფაჟავა.

„ფაჟავამ ჩათვალა, რომ ჩვენი ჯგუფი მის გადაღებას ცდილობდა და კოლეგების მისამართით აგრესია გამოხატა, თუმცა smo.ge- ს ჟურნალისტები არა ჟურნალისტს, არამედ რესპოდენტს იღებდნენ“,- განაცხადა გამოცემის რედაქტორმა.

მედია ორგანიზაციამ მომხდარ ფაქტზე გამოძიების დაწყება ადგილობრივ სამმართველოში მოითხოვა.

„ამ წუთებში დაზარალებული თანამშრომლები სამმართველოში იმყოფებიან და ჩვენებას აძლევენ პოლიციელებს. ფაჟავამ არა მარტო ფიზიკური, არამედ ფინანსური ზარალიც მოგვაყენა. მიკროფონის ჩარტყმისას დაზიანდა ჩვენი კუთვნილი ვიდეოკამერა“,- განმარტა ბასილამ.

მისი თქმით, ტელეკომპანია „მაესტროს“ რეგიონალური ჟურნალისტის აგრესია პირველი არ არის.

„ქალბატონი ნანა მე პირადად დამემუქრა, რომ მის ახლობელ სვანებს ჩემს გაქრობას დაავალებდა“,- აცხადებს მალხაზ ბასილაია.

Internet.ge