დევნილთა საკითხებში მინისტრის მოადგილე ვალერი კოპალეიშვილი თბილისში, ისნის რაიონში, ვაზისუბნის II მ/რ-ში მცხოვრებ დევნილებს შეხვდა და საჯარო რეესტრის საკუთრების დამადასტურებელი ამონაწერები გადასცა.

ყოფილ 165-ე ბაგა-ბაღში აფხაზეთიდან იძულებით გადაადგილებული 111 პირი ცხოვრობს, რომლებიც 1992 წლიდან თბილისის სხვადასხვა ავარიულ კომპაქტურ ობიექტებში - ბალნეოლოგიურის შენობაში, მე-9 საავადმყოფოსა და ღუდუშაურის კლინიკაში წლების განმავლობაში მძიმე პირობებში ცხოვრობდნენ.

დევნილთა საცხოვრებელი პირობების გაუმჯობესების მიზნით ყოფილი ბაგა-ბაღის შენობას 2011 წელს სრული რეაბილიტაცია ჩაუტარდა, მოგვარდა დევნილთათვის მნიშვნელოვანი საკითხები - დამონტაჟდა ინდივიდუალური ელ.მრიცხველები და ახალი საკომუნიკაციო სისტემა, რის შემდეგაც ყოფილ 165-ე ბაგა-ბაღში აფხაზეთიდან დევნილი ოჯახები ახალ, კეთილმოწყობილ საცხოვრებელ ფართებში განსახლდნენ. კვირის ბოლოდან კი აღნიშნულ ობიექტში გაზიფიცირების პროცესი დაიწყება. თუმცა, დღემდე დევნილების მთავარ საჭიროებად ბინების საკუთრებაში გადაცემა რჩებოდა.

დღეს მინისტრის მოადგილე ვალერი კოპალეიშვილმა თითოეულ დევნილ ოჯახს პირადად გადასცა საკუთრების დამადასტურებელი საბუთი. დღეიდან მათ უკვე შეუძლიათ შექმნან კორპუსის "ამხანაგობა" და მიიღონ ის სარგებელი, რაც აღნიშნული პროგრამის ფარგლებში ქალაქ თბილისის მერიის მიერ ხორციელდება.

internet.ge