სოფელ ლაფანყურის რწმუნებულის ბორის ფარკინაშვილის განცხადებით, სოფელ ლაფანყურში, დევნის ოპერაციის მიუხედავად, მოსახლეობას საფრთხე არ ემუქრება.

მისი ინფორმაციით, სოფელში პანიკა არ არის და არც ამის საფუძველი არსებობს.

„დევნის ოპერაცია მიმდინარეობს, დაკარგული ბიჭები კი გათავისუფლებულები არიან, მე მათ პირადად შევხვდი და რამდენიმე საათში საკუთარ ოჯახებს დაუბრუნდებიან. სოფელში კი, პანიკა არ არის და ამის არც საფუძველია“,- განაცხადა ფარკინაშვილმა.

შეგახსენებთ, რომ საქართველო-რუსეთის საზღვართან, დაღესტნის მონაკვეთთან, საქართველოს ტერიტორიაზე, აღმოჩენილია შეიარაღებული ჯგუფი. შინაგან საქმეთა სამინისტროს მიერ ხორციელდება აღნიშნული ჯგუფის დევნის ოპერაცია. შსს ქვედანაყოფებს ბლოკირებული აქვთ ხეობა.

საქართველოს მოქალაქეთა უსაფრთხოების უზრუნველსაყოფად ყველა ზომები მიღებულია.

Internet.ge