ზუგდიდში 4 ოქტომბერს ტრაგიკულად დაღუპული წლისა და 7 თვის ნიკა კვირტიას ოჯახის ახლობლები მომხდარის შესახებ „პრესა.ჯი“-სთან პირველად საუბრობენ.
"ინტერნეტ.ჯი" აღნიშნულ ინტერვიუს უცვლელად გთავაზობთ: 

უბედური შემთხვევა მაშინ მოხდა, როცა გარდაცვლილის მამა და მეზობლები, „ქართული ოცნების“ მიერ ზუგდიდში გამართულ აქციაზე მიდიოდნენ. 

"როგორც კვირტიების ახლობელმა „პრესა.ჯი“-ს განუცხადა, გარდაცვლილის მამა კოალიციის აქტივისტი იყო. თუმცა, მისი თქმით, უბედურ შემთხვევასთან, რომელსაც ბავშვის სიცოცხლე შეეწირა, პოლიტიკას არავითარი კავშირი არ აქვს. 

გარდაცვლილის ნათესავი: „ქართული ოცნების“, აქტივისტებმა გადაწყვიტეს ირაკლი ალასანიასთვის მხარდაჭერა გამოეხატათ და მეზობელს, რომელსაც სამარშუტო ტაქსი ჰყავს, სთხოვეს ქალაქის ცენტრში გაეყვანათ. ამ დროს პატარა მამასთან ერთად იმყოფებოდა, რომელმაც მცირეწლოვანი, აქტივისტების შეკრებამდე ბებიას ჩააბარა. 

თავად კი მაისურის გამოსატანად სახლში შევიდა. როგორც ჩანს, ბებიას ბავშვი მხედველობიდან გამორჩა. შემდეგ კი რაც მოხდა ყველამ კარგად იცით, ბავშვი მანქანის ქვეშ შეძვრა და სამარშუტო მანქანამ გადაუარა. 

- რა ბედი ეწია ვიტალი ახალაიას, რომელიც აღნიშნულ სამარშუტო ტაქსს მართავდა?

- რა უნდა მოსვლოდა, მომხდარიდან რამდენიმე წუთში ის ზუგდიდის პოლიციას ჩაბარდა. თუმცა, ოჯახის ახლობლების მოთხოვნით, ერთ საათში გაათავისუფლეს. მას ბრალი ნამდვილად არ მიუძღვის ამ საშინელ ტრაგედიაში. მშრომელი ბიჭია, დევნილი. 

დისტრიბუტორად მუშაობდა და ამით არჩენდა ოჯახს. ის სამსახურში მიდიოდა, როდესაც ახლობლებმა ზუგდიდის ცენტრში გაყვანა სთხოვეს და სწორედ ამ დროს მოხდა შემთხვევა. პირადად მამამ და ბებიამ დაწერეს განცხადება და წინასწარი პატიმრობიდან მისი დაუყოვნებლივ გათავისუფლება მოითხოვეს. 

- მომხდარიდან რამდენიმე წუთში აღნიშნულ საქმეს პოლიტიკური ელფერი დაედო...

- სწორედ ამიტომ დაგთანხმდით ინტერვიუზე. არ მინდა ჩვილის გარდაცვალების ფაქტი გარკვეული პოლიტიკური მანიპულირების თემად იქცეს. ერთია პოლიტიკური შეხედულება და მეორე ადამიანური ტრაგედია. 

შეგახსენებთ, რომ საზარელი ტრაგედია ზუგდიდის რაიონ ნაწულუკუში მოხდა.
აღნიშნულ ფაქტს იმავე დღეს გამოეხმაურა „თავისუფალი დემოკრატების“ პრეს-სპიკერი ვაკო ავალიანი, რომელმაც განაცხადა: 

„საშინელი ტრაგედია მოხდა. გაირკვა, რომ ჩვენმა ერთ-ერთმა აქტივისტმა, რომელსაც თან მცირეწლოვანი შვილი ახლდა და რომელიც მიკროავტობუსში ადიოდა, ბავშვს ხელი გაუშვა, ბავშვი მიკროავტობუსის ქვეშ შეძვრა, მანქანა დაიძრა და ბავშვი დაიღუპა.“

internet.ge