"ნაციონალური მოძრაობის" ერთ-ერთი ლიდერის, დავით დარჩიაშვილის  მტკიცებით, საქართველოს პარლამენტში უმრავლესობით შესულ ძალას ოპოზიციაში გადასული ძალა  მუშაობაში ხელს არ შეუშლის, თუმცა ნგრევის უფლებას არ მისცემს.

ამ და სხვა საკითხებზე „პრესა.ჯი“ დარჩიაშვილს ესაუბრა.  ‘’ინტერნეტ.ჯი" აღნიშნულ ინტერვიუს უცვლელად გთავაზობთ:

- ბიძინა ივანიშვილმა დღეს ეკონომიკური გუნდი წარადგინა. კოალიციის ლიდერმა მინისტრობის კანდიდატები შეცვალა. ინფრასტრუქტურის მინისტრად დასახელებული კახი კალაძე ენერგეტიკის მინისტრობის პოსტზე წარადგინეს...

- ბიძინა ივანიშვილის განცხადებებმა ცხადყო, რომ ისინი მთავრობის გადაბარებისთვის მზარ არ იყვნენ. ფაქტია, რომ კოალიციის ლიდერს მთავრობის ფორმირება გაუჭირდა. სასაცილოა ის კრიტერიუმიც, რომლითაც ამ შემთხვევაში კახი კალაძე შეირჩა. აღმოჩნდა, რომ მას გამოცდილება არ აქვს, მაგრამ  პრემიერ-მინისტრობის კანდიდატი ჭკვიან ბიჭად მაინც აღიქვამს. ეს ყველაფერი კი კითხვებს აღძვრავს. ორიოდე დღის წინ მინისტრებად გაგვაცნეს სხვა სახეები, დღეს სხვას ვხედავთ.

- კალაძეს არ დაუმალავს, რომ მას ენერგეტიკის სფეროში გამოცდილება საერთოდ არ აქვს, მისი საქმის უცოდინრობა ენერგოუსაფრთხოებაზე როგორ აისახება?

- მას გამოცდილება არც წინა სექტორში და არც ახალ სამინისტროსთან მიმართებაში აქვს. ფეხბურთს რომ თავი დავანებოთ, როდესაც კალაძე ბიზნეს გამოცდილებაზე საუბრობს, ეს სახელმწიფო ინსტიტუტების მართვასთან თანხვედრაში არ არის. ენერგეტიკაში ბოლო 8 წლის განმავლობაში ძალიან ბევრი რამ გაკეთდა. ამიტომ ჩვენ მკაცრად გავაკონტროლებთ.  თუ ამ ადამიანს ახლი ჰესების მშენებლობის უნარი არ აღმოაჩნდება ძველს არ დავანგრევინებთ.

- ლტოლვილთა და განსახლების მინისტრობის კანდიდატ დავით დარახველიძეზე რისი თქმა შეგიძლიათ? ის არჩევნებამდე ქუჩაში ტანკებით სიარულზე ოცნებობდა...

- დავით დარახველიძე წინასაარჩევნოდ აკეთებდა განცხადებებს, რომ საქართველოში მომრავლდნენ ჩინელები, ზანგები, ახდენდა ეთნიკური ნიშნით ადამიანების დისკრედიტაციას, იმედია ეს რიტორიკა შეიცვლება. მისი ეს განცხადებები სრულიად აცდენილია ადამიანის უფლებების დაცვას.

- კიდევ ერთი აქტუალური თემა პარლამენტის ქუთაისში არსებობის საკითხია...

- „ერთიანი ნაციონალური მოძრაობისა“ და პირადად მიხეილ სააკაშვილის მთავარი ამოცანა საქართველოში პროვინციალიზმის დასრულება იყო. ჩვენ მიგვაჩნია, რომ ყველა რეგიონი უნდა განვითარდეს. ეს ისტორიული პროცესი არ უნდა შეჩერდეს.

- რაც შეეხება პარლამენტის პირველი სხდომის ჩატარების თარიღს, კოალიციის წევრები აცხადებენ, რომ შესაძლოა,  პარლამენტის პირველი სხდომა ქუთაისის ახალ პარლამენტში ვერ ჩატარდეს...

- ახალ პარლამენტში  სამუშაო პირობები უზრუნველყოფილია. პირველი სხდომა 21 ოქტომბერს გამართება. კიდევ ვიმეორებ, ამ დროისთვის ყველაფერი მზად იქნება.

- ამ ყველაფრის გათვალისწინებით, რამდენად რეალურია „ნაციონალურ მოძრაობასა“ და „ქართულ ოცნებას“ შორის ცივილური ურთიერთობა?

- ეს დამოკიდებულია იმაზე, როგორ ამოქმედდება მთავრობა. თუ ახალი მთავრობა რაიმე კარგს გააკეთებს, ხელის შეშლას არ ვაპირებთ. ჩვენ ვიდგებით ყველაფერი იმის სადარაჯოზე, რაც აქამდე გაგვიკეთებია.

Internet.ge