ბიძინა ივანიშვილმა 2012 წლის
საპარლამენტო არჩევნებამდე ქვეყანა უნდა დატოვოს, წინააღმდეგ შემთხვევაში, ბიზნესმენის დეპორტაცია განხორციელდება.
„უცხოელთა სამართლებრივი მდგომარეობის შესახებ“ საქართველოს კანონის
მიხედვით, ევროკავშირის წევრი ქვეყნის მოქალაქეს შეუძლია ქვეყანაში 360 დღე დაჰყოს. ამის შემდეგ კი, მან ქვეყანა თუნდაც ერთი დღით უნდა დატოვოს და
დაფიქსირდეს, რომ საზღვარი გადაკვეთა.
ამ საკითხთან დაკავშირებით „ინტერნეტ.ჯი“ ბიძინა ივანიშვილის იურისტსა და პარტია
„ქართული ოცნება -დემოკრატიული საქართველოს“ საინიციატივო ჯგუფის წევრს არჩილ
კბილაშვილს ესაუბრა.
- ბიძინა ივანიშვილმა მიმდინარე წლის ოქტომბრამდე
უნდა დატოვოს ქვეყანა, წინააღმდეგ შემთხვევაში მას დეპორტაცია ელის. რას აპირებს
ოლიგარქის გუნდი და რა რჩევას აძლევთ მას, როგორც პირადი იურისტი?
- დღეს მოქმედი კანონით, 360 დღე არის ის დრო, როდესაც შეუძლია
უცხოელს იმყოფებოდეს საქართველოში, ამის შემდეგ კი მან უნდა გადაკვეთოს ქვეყნის
საზღვრები.
- რა მოხდება მაშინ, თუკი 360 დღის გასვლის
შემდეგ, მას არ ექნება გადაკვეთილი საზღვარი?
- ამ შემთხვევაში კანონის ეს
რეგულაცია იქნება უკვე ამოწურული და ამიტომ ბიძინა ივანიშვილი მოვალე იქნება
ერთხელ მაინც გადაკვეთოს საზღვარი. ეს იმ შემთხვევაში მოხდება, თუ კანონი არსებული
სახით დარჩება და არ შეიცვლება.
- როდის აპირებს ბიძინა
ივანიშვილი ქვეყნის დატოვებას?
- ის კანონს ყოველთვის იცავდა და ამბობს, რომ ყოველთვის დაიცავს. კანონის დარღვევის მოლოდინი არავის უნდა ჰქონდეს.
- რომელ ქვეყანაში წავა
ბიზნესმენი, თუნდაც ერთი დღით?
- ვერ გეტყვით, ეგ არვინ იცის. საჭიროების მიხედვით იქნება, ალბათ, ეს
გადაწყვეტილი.
- თუ ივანიშვილი არ დატოვებს ქვეყნის საზღვრებს,
ემუქრება მას დეპორტაცია?
- აქ სხვადასხვა მექანიზმები ერთვება. როდესაც ოჯახის წევრები არიან
საქართველოს მოქალაქეები, ეს უფლება იზღუდება. თუმცა დეპორტაცია მაინც დასაშვებია, რაც უკვე სასამართლოს დონეზე უნდა გადაწყდეს. როდესაც ოჯახის ყველა წევრი
საქართველოს მოქალაქეა, ამ შემთხვევაში მას უფრო მეტი უფლება აქვს. ეს უნდა იყოს
სასამართლო განხილვის საგანი.
Internet.ge
