აფხაზეთის ე.წ. უშიშროების საბჭოს მდივანი აცხადებს, რომ საქართველომ აფხაზეთთან მიმართებაში ტაქტიკა შეცვალა და აირჩია გზა - ჩართულობა აღიარების გარეშე, რომელიც სხვადასხვა, მათ შორის, სამედიცინო პროექტების რეალიზაციას ითვალისწინებს.
"მე შემიძლია გავიგო, როცა იქ სამკურნალოდ ჩაჰყავთ მოხუცები და ბავშვები (აფხაზეთიდან), მაგრამ არ მესმის, როცა ნარკოდამოკიდებული ადამიანები ჩადიან და მათთან გარკვეული სამუშაოები ტარდება. ამ კუთხით კრიმინალური პირობები ძალიან ხელსაყრელი შეიძლება იყოს ყველაფრისთვის – დივერსიებისთვის, ტერაქტებისთვის და ა.შ. მითუმეტეს, ჩვენ ვიცით, რომ მათთან ძალიან მჭიდროდ მუშაობენ," - განაცხადა ლაკობამ მრგვალ მაგიდასთან ადგილობრივ სატელევიზიო ეთერში.
მისი თქმით, იმისათვის, რომ აფხაზებს აღარ გაუჩნდეთ ქართულ მხარეს სამკურნალოდ წასვლის სურვილი, სოხუმმა თავისი სამედიცინო სტრუქტურები უნდა განავითაროს.
ლაკობას განსაკუთრებით ის ფაქტი აშფოთებს, რომ თვით ომის მონაწილეები და ორდენოსნებიც კი ქართულ მხარეს გადადიან სამედიცინო დახმარების მისაღებად.
"როცა ისინი ხელს აწერენ ზოგიერთ დოკუმენტს ქართულ ენაზე და არ იხდიან მკურნალობის ფულს, ისინი იღებენ დახმარებას, როგორც საქართველოს მოქალაქეები. მაგრამ უფასო ყველი, როგორც ამბობენ, მხოლოდ ხაფანგშია," - განაცხადა მან.
"თამაში არ დამთავრებულა, მაგრამ ჩვენი საზოგადოება ძალიან მოეშვა" - განაცხადა ლაკობამ
და დასძინა, რომ ვინც ჩავა საქართველოში, შეუძლია დარჩეს კიდეც და საქართველოს მოქალაქეც გახდეს.
ლაკობა არწმუნებს აფხაზებს, რომ თბილისს აფხაზური საზოგადოების გახრწნა სურს და აფხაზები ფსიქოლოგიური დამუშავების ობიექტები ხდებიან.
"არცერთი ჩვენი ნარკომანი არ განიკურნება საქართველოში... ისინი თვლიან, რომ მათ იქ (საქართველოში) მეგობრები ჰყავთ, მაგრამ თავად სააკაშვილმა, როცა ხელისუფლებაში მოვიდა, ნარკომანები დაიჭირა, ჩვენი ნარკომანებისთვის კი შეიძლება იქ სამკურნალოდ ჩასვლა. ამ მიმართულებით ნეგატიური მიმართულებით ძვრა გვაქვს," - განაცხადა აფხაზეთის ე.წ. უშიშროების საბჭოს მდივანმა.
Internet.ge
