სამხრეთ ოსეთსა და საქართველოს შორის ვერ დამყარდება ეკონომიკური ურთიერთობა, ვიდრე თბილისი უსაფრთხოების გარანტიებს არ განსაზღვრავს - განაცხადა ცხინვალში გამართულ ბრიფინგზე სეპარატისტული რეჟიმის ლიდერის წარმომადგენელმა პოსტკონფლიქტური დარეგულირების საკითხებში მურატ ჯიოევმა.

მისი თქმით, ეს საკითხი ჟენევის ბოლო რაუნდის განხილვის საგანიც იყო.

„რაც შეეხება ეკონომიკურ თანამშრომლობას, რაზეც საქართველოს ახალი ხელისუფლება საუბრობს, ჩვენ განვაცხადეთ, რომ ვიდრე არ მოგვცემენ უსაფრთხოების გარანტიებს, ჩვენს შორის ვერანაირი ეკონომიკური პროექტები ვერ განხორციელდება,“ - განაცხადა ჯიოევმა.

მან ხაზი გაუსვა, რომ ეკონომიკური ურთიერთობების განვითარება მხოლოდ თბილისის მხრიდან ძალის გამოუყენებლობის შეთახმების ხელმოწერის შემდეგ იქნება შესაძლებელი.

ჯიოევის თქით, ოსურმა მხარემ ჟენევის დისკუსიებზე კიდევ ერთხელ მოუწოდა თბილისს იმუშაოს ე.წ. საზღვრის დელიმიტაციასა და დემარკაციაზე.

„ჩვენ შევახსენეთ, რომ შექმნილი გვაქვს კომისია დემილიტაციისა და დემარკაციის შესახებ და მივმართეთ ქართულ მხარეს, დავიწყოთ ერთობლივი მუშაობა,“ - აღნიშნა მან.

“ქართული მხარე ადრე იყენებდა ტერმინს „ადმინისტრაციული ხაზი“ ან „ადმინისტრაციული საზღვარი“, ამჯერად კი გამოყენებულ იქნა ტერმინი „ადმინისტრაციულ-სასაზღვრო ხაზი“, რასაც არაფერი აქვს საერთო ჩვენს საზღვართან,” - განმარტა ჯიოევმა.

Internet.ge