ე.წ. საპრეზიდენტო არჩევნების მეორე ტურში გამარჯვების შემთხვევაში, „სამხრეთ ოსეთის" „კგბ"-ს ყოფილი ხელმძღვანელი ლეონიდ თიბილოვი ცხინვალის რეგიონის რუსეთთან კიდევ უფრო მჭიდროდ დაახლოებას შეცდება.
„რუსეთს ჩვენი სახე უნდა ვუჩვენოთ. ჩვენ არ გავაწბილებთ რუსეთის ხელისუფლებას და რუს ხალხს და დავამტკიცებთ, რომ სამხრეთ ოსეთის ხალხი მისი ერთგულია და მათ ამის უნდა სჯეროდეთ" - განაცხადა თიბილოვმა და დასძინა, რომ მოსკოვთან თანამშრომლობას, განსაკუთრებით, თავდაცვით სფეროში გააღრმავებს. კონკრეტულად, რა გაღრმავებაზე საუბრობს თიბილოვი, უცნობია, რადგან ოკუპირებული ტერიტორია ისედაც რუსეთის სამხედრო ბაზადაა ქცეული და ფინანსურად, მთლიანად მოსკოვის „შემოწირულობაზეა" დამოკიდებული.
თიბილოვმა ერთგვარი გაფრთხილება მისცა მის კონკურენტს მეორე ტურში დავით სანაკოევს, რომელიც აცხადებს, რომ „არჩევნების" ფალსიფიკაციის გარეშე ჩატარების შემთხვევაში „პრეზიდენტი" სწორედ ის გახდება. თიბილოვმა მისი მისამართით განაცხადა, რომ არ დაუშვებს „არჩევნების" ჩავარდნას, რადგან ის და მისი მხარდამჭერები გამარჯვებაში დარწმუნებულები არიან.
internet.ge
