ჩრდილოეთ ოსეთის ხელმძღვანელი თეიმურაზ მამსუროვი არ გამორიცხავს, რომ ე.წ. პრემიერობის კანდიდატს ცხინვალს, მოსკოვი შესთავაზებს. ამის შესახებ მან „რუსეთის ახალი ამბების სამსახურთან“ საუბრისას განაცხადა.

მამსუროვი „პრემიერის“ შერჩევის უფლებას სეპარატისტული რეჟიმის ახალი ლიდერის უფლებას უწოდებს, თუმცა როგორც დიმიტრი მედვედევის მიერ ამ ოკუპირებულ რეგიონში დანიშნული რუსეთის პრეზიდენტის სპეცწარმომადგენელი, ურჩევს ლეონიდ თიბილოვს, რომ კონსულტაცია მოსკოვთან გაიაროს.

„თუ ის ჩათვლის საჭიროდ მოსკოთან კონსულტაციას ან სულაც იქიდან მოიწვევს ვინმეს, ეს მისი უფლებაა. მე არ გამოვრიცხავ ასეთ ვარიანტს. .”უფრო მეტიც, მე თავად ასე მოვიქცეოდი. თუკი მე მეხმარება უდიდესი ქვეყანა, მაძლევს დიდ ფულს,  სასურველი იქნებოდა, რომ თავად მათ ან მათმა წარმომადგენელმა მიიღოს მოქალაქეობა სამხრეთში, იყოს მარჯვენა ხელი, როგორც ამ ფულის ერთ-ერთი პატრონი, რომ ის ჭკვიანურად გაანაწილოს“ - განაცხადა მამსუროვმა, რომელმაც, პრინციპში,  ამ ფორმით, მოსკოვის ნება-სურვილი  „დიპლომატიურად“ გააცნო ცხინვალელებს, რომ მათ ე.წ. ახალ პრემიერს კრემლის ნებართვის გარეშე ვერ დანიშნავენ.

რუსი პრემიერის მუშაობის შედეგები რეგიონში კარგად იციან. ჩელიაბინსკელი ვადიმ ბროვცევი, რომელიც ამ პოსტზე კოკოითის პერიოდში სწორედ მოსკოვის მითითებით დანიშნეს,  ცხინვალში „ჩელიაბინსკელ მოროდიორადაა“ ცნობილი, რომელსაც სხვადასხვა კლანებთან ერთად „დიდი წვლილი“ მიუძღვის რუსული ფულის გაფლანგვაში.

Internet.ge