აფხაზეთის ე.წ. პარლამენტის სპიკერმა ვალერი ბგანბამ, სამხრეთ კავკასიაში ევროკავშირის სპეცწარმომადგენელი ფილიპ ლეფორი მიიღო. ლეფორს ევროკავშირის პოლიტიკური მრჩევლებიც ახლდნენ - იუწყება „აბხაზია ორგ“.

„ჩვენ ღია ვართ დიალოგისთვის. პირდაპირი კონტაქტები და უშუალო დიალოგი ჩვენ წინ წაგვწევს“ - განაცხადა ბგანბამ შეხვედრისას. ამასთან, მან წუხილი გამოთქვა იმის, გამო, რომ დასავლეთის პოლიტიკოსები აფხაზეთის შესახებ ობიექტური ინფორმაციის გავრცელებას არ უწყობენ ხელს.

ლეფორმა ბგანბას ჯერ კიდევ მისი წინამორბედის, პიტერ სემნების პერიოდში შეთავაზებული სტრატეგია „ჩართულობა აღიარების გარეშე“ შეახსენა და განაცხადა, რომ როგორც ევროკავშირის სპეცწარმომადგენელი სამხრეთ კავკასიაში, მზადაა  აფხაზურ მხარესთან ყველა საკითხში ითანამშრომლოს.

„ჩვენი კონცეფცია ასახულია ძალიან მნიშვნელოვან დოკუმენტში, რომელიც ევროკავშირმა 27 თებერვალს  მიიღო. ეს არის მინისტრთა საბჭოს დასკვნა ევროკავშირის საგარეო პოლიტიკის შესახებ. იქ ცალსახადაა გადმოცემული ყველა ქმედების კონცეფცია აღიარების გარეშე. ამ პროექტის ფარგლებში სხვადასხვა სფეროებში მუშაობა მიმდინარეობს“ - განაცხადა ლეფორმა.

ვალერი ბგანბას თქმით, აფხაზურ მხარეს არ მოსწონს, რომ დასავლეთის სტრატეგია თბილისის პოზიციებს ეფუძნება და წლების განმავლობაში უცვლელი რჩება.

შეხვედრის მონაწილე ევროკავშირის პოლიტიკურმა მრჩეველმა, მაგდალენა გრონომ ბგანბას შესთავაზა, რომ სურთ აფხაზურ მხარესთან ერთად განიხილონ ევროპული ცენტრის მიერ უცხოური ენების შესწავლის, უნივერსიტეტებს შორის კავშირების დამყარების, ინტერნეტ-ბიბლიოთეკებზე ხელმისაწვდომობის საკითხები.

Internet.ge