გალის რაიონის სოფელ გაგიდადან რუსმა სამართალდამცავებმა 4 ახალგაზრდა მამაკაცი აიყვანეს. აღნიშნული ინფორმაცია „ინტერნეტ.ჯი“-ს საქართველოს ოკუპირებული რეგიონიდან აცნობეს. წყაროს ინფორმაციით, ინციდენტი რამდენიმე საათის წინ მოხდა.

დაკავებულების ახლობლები აცხადებენ , რომ ბიჭები, სავარაუდოდ, გალში ე.წ წინასწარი დაკავების იზოლატორში ჰყავთ მოთავსებული. დაკავების მიზეზი ახალაზრდებისთვის არ აუხსნიიათ.

„გაგიდას მკვიდრი 4 ახალგაზრდა ზღვაზე იმყოფებოდა, როცა ოკუპანტებმა, ისინი ყოველგვარი ახსნა-განმარტების გარეშე მანქანაში ჩასვეს და გალის მიმართულებით წაიყვანეს“,- აცხადებს წყარო.

ამასთან, როგირც „ინტერნეტ.ჯი“-სთვის გახდა ცნობილი, რუსმა სამართალდამცავებმა ოკუპირებულ ნაბაკევში მავთულ-ხლართები გააბეს და ყველა ავტომობილს საგულდაგულოდ ჩხრეკენ.

აღნიშნულ ფაქტთან დაკავშირებით „ინტერნეტ.ჯი“ სამეგრელო-ზემო სვანეთში აფხაზეთის ლეგიტიმური მთავრობის წარმომადგენელს თორნიკე კილანავას დაუკავშირდა.

კილანავა ამბობს, რომ ამ დროისთვის აღნიშნული ინფორმაციის გადამოწმება მიმდინარეობს.

Internet.ge