აფხაზეთში არაფერი შეცვლილა, პირიქით, კორუფცია გაიზარდა - ასეთია იმ სოხუმელი რესპონდენტების უმრავლესობის აზრი, რომლებიც „ეხო კავკაზამ“ გამოკითხა.

კითხვაზე - ანქვაბის „ხელისუფლებაში“ მოსვლის შემდეგ რა შეიცვალა კორუფციის მიმართულებით, ადგილობრივები პასუხობენ: არაფერი. ზოგიერთი ფიქრობს, რომ კორუფციას აფხაზეთში ვერც ვერასოდეს აღმოფხვრიან, ზოგიერთს კი მიაჩნია, რომ საქმეს უფრო მეტი პასუხისმგებლობით უნდა მიუდგნენ და ჯიბეები არ გაივსონ. ზოგიერთი კი თვლის, „მკაცრი ხელის“ - ალექსანდრე ანქვაბის პერიოდში კორუფცია არათუ შემცირდა, არამედ გაიზარდა.

„ვფიქრობ, ჩვენი ჩინოვნიკები, როგორც ადრე იშენებდნენ სახლებს, ისევე აგრძელებენ მშენებლობას. თუ სიმართლე გინდათ, მე არ ვენდობი მათ, მეჩვენება, რომ სულ ხელი აქვთ ჩაყოფილი სახელმწიფო ხაზინაში. აი, ჩატარდა საპარლამენტო არჩევნები, - მე არავისი მჯერა“ - აცხადებს სოხუმელი ქალბატონი. სხვა გამოკითხული კი ბრაზობს, რომ „ღმერთი დაივიწყეს, სირცხვილი დაივიწყეს, სინდისი დაივიწყეს… რევოლუცია თავში, გულშია საჭიროა, მერე კი გამოვა რაღაც კარგი. კანონებით, რეჟიმებით, ვერაფერს უშველი“ - ამბობს ის.

Internet.ge