"ერთიანი ნაციონალური მოძრაობის“ წევრი ხათუნა ოჩიაური ბიძინა ივანიშვილის მიერ პედაგოგებზე გაკეთებულ განცხადებას გამოეხმაურა და აღნიშნა, რომ ივანიშვილი პედაგოგებზე თავდასხმას განაგრძობს.  

„ბიძინა ივანიშვილი მათ დასჯით და დაპატიმრებით ემუქრება, აცხადებს, რომ მათი უმეტესობა უმაღლესი განათლების არმქონეა და 300 ლარად იყიდებიან. ჩვენთვის ასეთი თავდასხმები მიუღებელია, რადგან პედაგოგები ქართული საზოგადოების ერთ-ერთი საუკეთესო ნაწილია და მათზე ზრუნვა სახელმწიფოს ვალია“,- განაცხადა ოჩიაურმა.

მისი თქმით, არჩევნებში „ნაციონალური მოძრაობის“ გამარჯვების შემდეგ  გაგრძელდება განათლების სფეროში მიმდინარე რეფორმები.

გაიზარდა და კიდევ გაიზრდება მათი ხელფასები. რემონტდება სკოლები, რათა პედაგოგებს უკეთესი სამუშაო პირობები შეექმნათ, რადგან მათ მომავალი თაობის აღზრდას ვანდობთ“,- განმარტა უმრავლესობის წევრმა.

კოალიცია „ქართული ოცნების“ ლიდერმა შალვა რამიშვილის გადაცემაში სტუმრობისას მასწავლებლები ხელისუფლების სასარგებლოდ არჩევნების გაყალბებაში დაადანაშაულა.

როგორც ივანიშვილმა „მაესტროს“ ეთერში სტუმრობისას აღნიშნა, „ნაციონალური მოძრაობის“ აქტივისტებს ბოლომდე ჩაჰყვება.

„ის ადამიანები, რომლებიც საკუთარ მომავალს 300 ლარად ყიდიან კანონის წინაშე დაისჯებიან. შეიძლება მათ თავისუფლება დაკარგონ“,- განაცხადა ივანიშვილმა.

internet.ge