„ლეიბორისტული პარტიის“ ლიდერი შალვა ნათელაშვილი, ბიძინა ივანიშვილს ადამიანების „დაპატიმრებაში“ ადანაშაულებს. ნათელაშვილის განცხადებით, ივანიშვილმა მოქალაქეობის აღდგენის თემა გამოიყენა, რომ ხალხის საპროტესტო მუხტი ჩაეხშო.

„დიახ, ეს თემა გახდა საბაბი, რომ არ მომხდარიყო საყოველთაო პროტესტი ქალაქის ქუჩებში და ყურადღება გადატანილიყო სხვა თემაზე. ამ მიზნით, ივანიშვილმა მოისყიდა მასმედია, პოლიტიკოსები, არასამთავრობო ორგანიზაციები, საზოგადო და ხელოვნების მუშაკები. მიუსაჯა მათ შინაპატიმრობა და შეყარა ყველა თავის შუშის  სასახლეში, რომელიც წინასწარ ააშენა. ამით მან არ დაუშვა ხალხის მრისხანების ქუჩაში გამოსვლა. მან საუკუნის ღალატი ჩაიდინა“ - ამბობს ნათელაშვილი. 

კითხვაზე: დაუშვეს თუ არა ივანიშვილის ადვოკატებმა შეცდომა, მოქალაქეობის ნატურალიზაციის გზით მიღებასთან დაკავშირებით, ნათელაშვილს ასეთი პასუხი აქვს: „ არავითარი შეცდომა. ეს იყო განზრახული და მიზანმიმართული მოქმედება ივანიშვილისა. თუმცა თავისი სიჯიუტე და საშუალო დონის იურისტებისთვის დანანებული ფული, 500 ლარის ნაცვლად დაუჯდება 500 მილიონი. ძუნწი მეტს კარგავსო ნათქვამია“ - განმარტა ნათელაშვილმა.

„ლეობორისტული პარტიის“ ლიდერი, „ამომრჩეველთა ლიგის“ შექმნას და მათ ფუნქციებსაც ეხმაურება. ნათელაშვილი ამობს, რომ არანაირი ლიგის დახმარება არ სჭირდება, პირიქით, "ლეიბორისტების" თხოვნა იქნება, ხელს ნუ შეუშლიან მუშაობაში.

Internet.ge