კოალიცია „ქართული ოცნების“ ლიდერ ბიძინა ივანიშვილის მიერ  გამოცემა „ფრანს პრესისთვის“ მიცემულ სკანდალურ ინტერვიუს უმრავლესობის წევრი ეკა ხერხეულიძე გამოეხმაურა.

როგორც დეპუტატმა „ინტერნეტ.ჯი“-სთან საუბრისას აღნიშნა, რუსეთის მიმართ ივანიშვილის სიმპათიები უფრო ნათელი გახდა.

„ამ და სხვა განცხადებებმა ივანიშვილის პოლიტიკური ინტელექტი კარგად დაანახა საზოგადოებას. მერე უკვირთ, რატომ აქვთ ყველა საერთაშორისო გამოკითხვით დაბალი რეიტინგი. ამ შეურაცმყოფელ გამოვლინებებზე ჩემი დამოკიდებულება უერთდება იმ ურიცხვი ადამიანების პოზიციას, რომელებიც ფიქრობენ, რომ ივანიშვილი თავის პოლიტიკით ქვეყანას წარსულში დააბრუნებს. ხალხი დღეს ხედავს იმ პროგრესს, რომელსაც მმართველმა გუნდმა ბოლო 8 წლის განმავლობაში მიაღწია. რაც შეეხება მის სიმპათიებს რუსეთის პრეზიდენტის მიმართ, ამაში ახალი არაფერია. ივანიშვილი თავის გამოსვლებში ყოველთვის ცდილობს წინადადება ისე დააწყოს, რომ რუსეთს ოკუპანტი არ უწოდოს, ეს მაშინ, როცა ცივილიზებულ სამყაროში ეს ტერმინი დამკვიდრდა. ივანიშვილმა თავის პირველ გამოსვლაში ცალსახად აღნიშნა, რომ რუსეთს ქვეყნის დეოკუპაციაზე არ უნდა ვუყიჟინოთ,“- აცხადებს ხერხეულიძე.

ცნობისთვის, ივანიშვილი „ფრანს პრესისთვის“ მიცემულ ინტერვიუში აცხადებს, რომ რუსეთ-საქართველოს ომის მაპროვოცირებელი საქართველოს პრეზიდენტი იყო.

„მე არ მინდა ვაკრიტიკო პუტინი, რადგან არ მინდა დავემსგავსო სააკაშვილს და ვაკრიტიკო დიდი ქვეყანა... როგორ შეიძლება ვაკრიტიკოთ პუტინი, როდესაც ჩვენ სააკაშვილი გვყავს?“,- აცხადებს ივანიშვილი.

გამოცემასთან საუბრისას „ქართული ოცნების“ ლიდერი  არ შემოიფარგლა სააკაშვილის უბრალო კრიტიკითა და მას „პროფესიონალი მატყუარა“ და „ძაღლიშვილი“ უწოდა.

 Internet.ge