თბილისის მერის, გიგი უგულავას და „ერთიანი ნაციონალური მოძრაობის“ საბურთალოს მაჟორიტარობის კანდიდატის, ანდრია ურუშაძის დიდ დიღომში მოსახლეობასთან შეხვედრის მთავარი თემა დასაქმება და ხელმისაწვდომი ჯანდაცვა იყო.

როგორც უგულავამ სიტყვით გამოსვლისას აღნიშნა, მომდევნო ოთხი წლის მანძილზე მმართველი გუნდის მთავარი საზრუნავი უფრო მეტი სამუშაო ადგილის შექმნა იქნება.

„ჩვენ ერთად შევძელით დაგვემარცხებინა კორუფცია, შევძელით სუფთა საზოგადოების ჩამოყალიბება, მაგრამ ამის მიუხედავად მთავარ პრობლემად უმუშევრობა რჩება. სწორედ ამიტომ „ნაციონალურმა მოძრაობამ“ გადაწყვიტა ხელშეკრულება დაუდოს თითოეულ თქვენგანს, სადაც დეტალურად აღწერილია ის პროექტები, რომელთა გადაწყვეტა მომდევნო ოთხი წლის განმავლობაში მოგვიწევს, ეს არის უმუშევრობის დაძლევა, ჯანდაცვის ხელმისაწვდომობა და სხვ.  ჩვენ გაფორმებული ხელშეკრულების შესრულების ვადებსაც გთავაზობთ. თითოეულ თქვენგანს შესაძლებლობა გეძლევათ გადაამოწმოთ, შესრულდა თუ არა ესა თუ ის დაპირება დროულად და აკონტროლოთ ხელისუფლება“,- აღნიშნა გიგი უგულავამ.

თავის მხრივ მაჟორიტარობის კანდიდატმა აღნიშნა, რომ საქართველოს ძლიერი ჯანდაცვა სჭირდება.

ანდრია ურუშაძის განცხადებით, თითოეულმა მოქალაქემ თავი დაცულად უნდა იგრძნოს.

„ყველაფერს გავაკეთებთ, რომ ეს ქალაქი 4 წლის შემდეგ უფრო ლამაზი,  კეთილმოწყობილი გახდეს  და რაც მთავარია მოქალაქეებს სამსახურის მოძიებაში დავეხმაროთ“,- განაცხადა ურუძაძემ.

„ერთიანი ნაციონალური მოძრაობის“ სამუშაო კალენდარს მოსახლეობა მომდევნო დღეების განმავლობაში მიიღებს.

internet.ge