საქართველოს საგარეო საქმეთა მინისტრმა გრიგოლ ვაშაძემ ჩინეთის სახალხო რესპუბლიკის ეროვნული სახალხო კრების საგარეო საქმეთა კომიტეტის თავმჯდომარე ლი ჭაო სინი, თანმხლებ დელეგაციასთან ერთად, მიიღო.

შეხვედრის დროს მხარეებმა განიხილეს საქართველოსა და ჩინეთის სახალხო რესპუბლიკას შორის ურთიერთობების განვითარების პერსპექტივა როგორც ორმხრივ ფორმატში, ისე საერთაშორისო ორგანიზაციების ფარგლებში. აღინიშნა, რომ ბოლო წლების განმავლობაში ჩამოყალიბებული ნაყოფიერი თანამშრომლობა პოლიტიკის, ეკონომიკის, კულტურის და განათლების სფეროებში მომავალში კიდევ უფრო გაღრმავდება.

მხარეებმა აღნიშნეს, რომ კვლავ გაგრძელდება ორ ქვეყანას შორის პოლიტიკური დიალოგი საქართველოსა და ჩინეთის სახალხო რესპუბლიკის საგარეო საქმეთა სამინისტროებს შორის რეგულარული კონსულტაციების ფარგლებში.

ჩინეთის სახალხო რესპუბლიკის ეროვნული სახალხო კრების საგარეო საქმეთა კომიტეტის თავმჯდომარემ კიდევ ერთხელ დაადასტურა თავისი ქვეყნის ხელისუფლების მხარდაჭერა საქართველოს ტერიტორიული მთლიანობისა და სუვერენიტეტის მიმართ.

internet.ge