როგორც „საზოგადოებრივ მაუწყებელზე“ მიმდინარე პოლიტიკური დებატებისას, „ლეიბორისტული პარტიის“ ლიდერმა, შალვა ნათელაშვილმა განაცხადა, სეპარატისტებთან ლაქუცი არ გამოვა.

„რა მოგვცა სეპარატისტებთან ლაქუცმა, გარდა ტერიტორიების დაკარგვისა? არძიმბას უმრავლესობა რომ მისცეს ის მოხდა, რაც ვნახეთ. ამ უფლების მიცემა  საქართველოს გულის ჩამოტეხვით დააგვირგვინდა.  ეთნიკურ უმცირესობებს მივმართავ - ჩვენ  ერთი სამშობლო და ერთი მომავალი გაგვაჩნია. ერთი ხომადლის მგზავრები ვართ და ეს ხომალდი მსოფლიო აკვატორიაში მშვიდად ერთად  გავიყვანოთ“, - განაცხადა ნათელაშვილმა.

გამოსვლისას, კახა კალაძემ ეთნიკურ უმცირესობებთან დაკავშირებით განსახორციელებელ პროექტებზე ისაუბრა და განაცხადა, რომ სახელმწიფომ ეთნიკური უმცირესობები პოლიტიკაში უნდა ჩართოს.

მისი თქმით, სახელმწიფო უმკაცრეს რეაგირებას მოახდენს უმცირესობების დისკრიმინაციის ნებისმიერ ფაქტზე.

„სახელმწიფო ეთნიკურ უმცირესობებს დაიცავს და ქართული ენის შესწავლის ხარისხს გააუმჯობესებს. ჩვენ საკუთარ თავზე იმ დაპირებებს ავიღებთ, რომელიც ხელისუფლებამ გასცა. ჩვენ ვუზრუნველვყოფთ ქართულ ბაზარზე სამცხე-ჯავახეთსა და ქვემო ქართლში წარმოებული პროდუქტის დაბრუნებას. ასევე კულტურის სახლებს გავხსნით და ბანაკებს წავახალისებთ, სადაც ბავშვები დამეგობრდებიან“, - განაცხადა კალაძემ.

საკითხზე საუბრისას გიორგი თარგამაძემ ყურადღება ეთნიკური უმცირესობებისთვის ქართული ენის შესწავლაზე გაამახვილა და განაცხადა, რომ მისი გუნდი ერთადერთია, რომელიც საარჩევნო პროგრამებს აზერბაიჯანულ, სომხურ და რუსულ ენებზე ბეჭდავს.

მმართველი გუნდის პირველმა ნომერმა, დავით ბაქრაძემ აქცენტები ოპონენტების გამონათქვამებზე გააკეთა და განაცხადა, რომ „ნაციონალური მოძრაობის“ პროგრამებს ოპონენტები ქსენოფობიურ განცხადებებსა და შეურაცხყოფაზე აგებულ პოლიტიკას უპირისპირებს.

„ჩვენი პროგრამებით ისარგებლებს ყველა განურჩევლად ეთნიკური უმცირესობებისა. არაერთი განცხადება მოგვისმენია ქართველი ხალხის მიმართ, რომელთაც ოპონენტებმა „დეგრადირებული მეგრელები“ და „ვაშლის გამყიდველები“ უწოდეს. ჩვენი ძალა ჩვენს ერთობაშია, ჩვენი სიმდიდრე კი, ჩვენს მრავალფეროვნებაში. დავით აღმაშენებელი სინაგოგასა და მეჩეთში დადიოდა და პირადად აძლევდა ხალხს ტოლერანტობის მაგალითს“, - განაცხადა ბაქრაძემ.

ბაქრაძის მტკიცებით, ქვეყანა არ დაუბრუნდება - ძალადობას, შეურაცხყოფასა და   ქსენოფობიას.

„ჩვენ ვერ დავბრუნდებით შუღლისა და შეურაცხყოფების წარსულში, რადგან საქართველოს ყველა მტერი ეთნიკური ნიშნის მიხედვით ყოფს“, - დასძინა მან.

შეგახსენებთ, რომ კვალიფიციური პოლიტიკური სუბიექტების საარჩევნო სიების პირველ ნომრებს შორის დებატები, პროექტ „დებატები 2012“-ის ფარგლებში „საზოგადოებრივი მაუწყებლის“ ეთერში  გაიმართა.  

Internet.ge