კოალიცია „ქართული ოცნება“ საქართველოს საგარეო საქმეთა სამინისტროს და საზღვარგარეთის ქვეყნებში საქართველოს დიპლომატიურ წარმომადგენლობებს მიმართვას უგზავნის.

მიმართვაში ნათქვამია, რომ „დიპლომატიური სამსახური უნდა იყოს არა ცალკეული პოლიტიკური, მათ შორის მმართველი მხარის ინტერესების გამტარებელი, არამედ, უპირველეს ყოვლისა, ქვეყნის ინტერესების დამცველი“.

კოალიცია დიპლომატიურ კორპუსს მოუწოდებს სამოქალაქო საზოგადოებასთან ერთად,  შეაფასონ არსებული ვითარება და „არა მხოლოდ ღირსეული, არამედ სახელმწიფოებრივი ნაბიჯიც გადადგან.“

„მოგმართავთ ყველა დიპლომატს, ვისაც სინდისი სუფთა აქვს, თავად აჩვენეთ მოქალაქეობრივი პასუხისმგებლობის მაგალითები და თავი დააღწიეთ მორალისა და კონსტიტუციური ჩარჩოებიდან გასული მმართველი რეჟიმის სამსახურს. ამის შანსი თქვენ ქართველ ხალხთან ერთად გეძლევათ 1 ოქტომბერს. აქვე შეგახსენებთ, რომ მსგავსი ღირსეული, პატრიოტული და სახელმწიფოებრივი მაგალითებიც მოიძებნება საქართველოს უახლოეს ისტორიაში,“- ნათქვამია მიმართვაში. 

გავრცელებულ მიმართვას კოალიცია „ქართული ოცნების“ წევრები სალომე ზურაბიშვილი, ირაკლი ალასანია, თედო ჯაფარიძე, ალექსი პეტრიაშვილი, ვიქტორ დოლიძე, მაია ფანჯიკიძე, დავით ზალკალაინი, ზაალ გოგსაძე, გიორგი ვოლსკი, ირაკლი ჩიქოვანი და კონსტანტინე სურგულაძე აწერენ ხელს.

Internet.ge