შინაგან საქმეთა სამინისტროს ეკა ზღულაძე უხელმძღვანელებს. ამის შესახებ საგანგებო განცხადება მინისტრის პირველმა მოადგილემ რამდენიმე წუთის წინ გააკეთა. 

ეკა ზღულაძე შს მინისტრის პირველ მოადგილედ რამდენიმე თვის წინ დაინიშნა, მინისტრის გათავისუფლების შემდეგ კი, სამინისტროს დებულების თანახმად, მინისტრის მოვალეობას სწორედ პირველი მოადგილე ასრულებს.

შეგახსენებთ, რომ შინაგან საქმეთა მინისტრმა ბაჩო ახალაიამ პრეზიდენტს გადადგომის მოთხოვნით მიმართა.

"მე, როგორც ჩვენი ქვეყნის მოქალაქე, შეძრწუნებული ვარ იმ დანაშაულით, რომელიც გლდანის მერვე საპყრობილეში გამოვლინდა. მიუხედავად იმისა, რომ მე უკვე წლებია აღარ ვხელმძღვანელობ სასჯელაღსრულების სისტემას, ზოგიერთმა ხელმძღვანელმა პირმა, რომლებიც ვალდებულნი იყვნენ არ დაეშვათ მსგავსი ამაზრზენი ფაქტები, ჩემი ხელმძღვანელობის დროს დაიწყო მუშაობა სისტემაში. აქედან გამომდინარე მე ვგრძნობ მორალურ  და პოლიტიკურ პასუხისმგებლობას  იმის გამო, რომ ჩვენ ვერ აღვკვეთეთ ეს საშინელი პრაქტიკა. ამიტომ მივმართე პრეზიდენტს ჩემი გადადგომის შესახებ განცხადებით" - ნათქვამია განცხადებაში, რომელიც შს სამინისტროს ვებ-გვერდზე გამოქვეყნდა.

შინაგან საქმეთა მინისტრის თანამდებობაზე ახალაია 2012 წლის 4 ივლის დაინიშნა. 2009-2012 წლებში ის თავდაცვის მინისტრის პოსტს იკავებდა.  2008-2009 წლებში ახალაია თავდაცვის მინისტრის მოადგილე იყო, 2005-2008 წლებში კი საქართველოს იუსტიციის სამინისტროს სასჯელაღსრულების დეპარტამენტის უფროსად დაინიშნა.

internet.ge