თავისუფალი და სამართლიანი არჩევნებისათვის უწყებათშორისი კომისია, ცენტრალურ საარჩევნო კომისიას, შინაგან საქმეთა სამინისტროსა და თავდაცვის სამინისტროს რეკომენდაციით მიმართავს.

აღნიშნულთან დაკავშირებით განცხადება, კომისიამ საკუთარ ვებ-გვერდზე გამოაქვეყნა.

როგორც განცხადებაშია ნათქვამი, თავისუფალი და სამართლიანი არჩევნებისათვის უწყებათშორისს კომისიას, კოალიცია „ქართულმა ოცნებამ“ მიმართა და 16 სექტემბერს მესტიის მუნიციპალიტეტში სამხედრო მოსამსახურეებისათვის დამატებითი სპეციალური საარჩევნო უბნის შექმნის საკითხის შესწავლა მოითხოვა. კოალიციის აზრით, არჩევნებამდე ორი კვირით ადრე აღნიშნულ უბანზე ამომრჩეველთათვის მაჟორიტარულ არჩევნებში ხმის მიცემის შესაძლებლობა უთანასწორო პირობებში ამყოფებს საარჩევნო სუბიექტებს და ბალანსს ხელისუფლების სასარგებლოდ არღვევს.

საარჩევნო კოდექსის 32 მუხლის 1 დ) ა) პუნქტის  თანახმად, საქართველოს თავდაცვისა და შინაგან საქმეთა სამინისტროების სამხედრო ძალებისა და შენაერთების ვადიანი და საკონტრაქტო სამსახურების სამხედრო მომსახურეების  სია სამხედრო ნაწილის ხელმძღვანელობამ შესაბამის საოლქო საარჩევნო კომისიას არა უგვიანეს საარჩევნო წლის 1-ელი ივლისისა, ხოლო სავალდებულო სამხედრო სამსახურში გაწვევის შედეგების გათვალისწინებით, კენჭისყრამდე არა უგვიანეს მე-6 დღისა უნდა გადასცეს.

„იმისდა მიუხედავად, რომ კანონმდებლობა არჩევნების დღემდე 6 დღით ადრე შინაგან საქმეთა და თავდაცვის სამინისტროების მიერ მიწოდებული სიების საფუძველზე, წვევამდელებისთვის დამატებითი სპეციალური უბნების გახსნას ითვალისწინებს, იმისათვის, რომ გამოირიცხოს სპეკულაცია ამ თემაზე, უწყებათაშორისი კომისია რეკომენდაციას აძლევს თავდაცვისა და შინაგან საქმეთა სამინისტროებს: შესაძლებლობა მისცენ იმ წვევამდელებს, რომლებიც 1-ელი ივლისის შემდეგ არიან გაწვეული სამხედრო სამსახურში,  ჯერ არ გაუვლიათ შიდა პროცედურული მომზადება და არ ასრულებენ არსებით ფუნქციას, არჩევნებში მონაწილეობა თავიანთი მუდმივი საცხოვრებელი ადგილის მიხედვით მიიღონ“,- ნათქვამია განცხადებაში.

უწყებათაშორისი კომისია ასევე რეკომენდაციას აძლევს ცენტრალურ საარჩევნო კომისიას: არ გაითვალისწინოს 1-ელი ივლისის შემდეგ სამხედრო სამსახურში გაწვეული პირები დამატებით სპეციალურ საარჩევნო უბნებში.

internet.ge