"ახალი მემარჯვენეები" მოვითხოვთ დაუყოვნებლივ განხორციელდეს ფართომასშტაბიანი ამნისტია, რომელიც ნაკლებად მძიმე და მსუბუქი დანაშაულისთვის მსჯავრდებულებს და ასეთივე დანაშაულისთვის  წინასწარ პატიმრობაში მყოფ განსასჯელებს შეეხებათ. აღნიშნულის შესახებ საგანგებოდ გამართულ ბრიფინგზე პარტიის ერთ-ერთმა ლიდერმა მამუკა კაციტაძემ განაცხადა.

„პენიტენციურ სისტემაში პატიმართა წამების ამსახველი კადრების ჩვენებამ ქვეყანაში უმძიმესი კრიზისი გამოიწვია, რომელმაც განსაკუთრებით მძიმე მდგომარეობაში პატიმართა ოჯახები ჩააგდო.  ეს ადამიანები  იმყოფებიან ფსიქოლოგიური სტრესის მდგომარეობაში, რადგან ნანახის შემდეგ ბუნებრივია მათი შიში ციხეში მყოფი ახლობლების მდგომარეობის გამო,“-განაცხადა კაციტაძემ.

კაციტაძის თქმით, ამ სიტუაციაში სწორი გადაწყვეტილება იქნება ნაკლებად მძიმე და  მსუბუქი დანაშაულისთვის  მსჯავრდებულთა და წინასწარ პატიმრობაში მყოფ პირთა  საპატიმრო ადგილებიდან გათავისუფლება.

„ამნისტია უნდა შეეხოთ მხოლოდ იმ მსჯავრდებულებს, რომლებმაც ჩაიდინეს ნაკლებად მძიმე და მსუბუქი დანაშაული - საგადასახადო გადაცდომა,  წვრილმანი ხულიგნობა და სხვა. მათი საპყრობილეებიდან გათავისუფლება,  ერთის მხრივ, ჩააწყნარებს  საპატიმროებთან არსებულ ვითარებას და  დაამშვიდებს არაერთ ოჯახს, მეორე მხრივ, განტვირთავს  საპატიმროებს და შეამსუბუქებს იქ შექმნილ  უმძიმეს ვითარებას.

"ახალი მემარჯვენეები" მივმართავთ ხელისუფლებას დაუყოვნებლივ  მიიღოს გადაწყვეტილება ამნისტიის შესახებ, ხოლო საპყრობილეებში დარჩენილი პატიმრების მიმართ  შექმნას გარანტიები, რომელიც  უზრუნველყოფს   სათანადო მოპყრობას და მათი უფლებების დაცვას,“-განაცხადა მამუკა კაციტაძემ.

Internet.ge