პარტია „თავისუფალ საქართველოს“, "საქართველოს ხალხთა მსოფლიო კონგრესი“ დააფინანსებს, რომლის პრეზიდენტიც ალექსანდრე ებრალიძეა.

აღნიშნულთან დაკავშირებით, პარტია „თავისუფალი საქართველოსა“ და „საქართველოს ხალხთა მსოფლიო კონგრესის“ ერთობლივი განცხადება, პარტიის ოფიციალურ გვერდზე გამოქვეყნდა.

როგორც განცხადებაშია ნათქვამი, „საქართველოს ხალხთა მსოფლიო კონგრესი“ და საზღვარგარეთ მცხოვრები ქართული დიასპორა მხარს უჭერს პარტია „თავისუფალ საქართველოს“, ვინაიდან ამ პარტიის პოლიტიკური კურსი ეფუძნება საქართველოს ეროვნულ ინტერესებს.

„კონგრესის წევრები, რომელბიც არიან საქართველოს მოქალაქეები, კანონით დადგენილი ნორმების დაცვით, განახორციელებენ  შემოწირულობებს პარტია „თავისუფალი საქართველოს“ ანგარიშზე. ასევე, კონგრესი გაუწევს ორგანიზებას საზღვარგარეთ მცხოვრები საქართველოს მოქალაქეების არჩევნებში მონაწილეობის პროცესს და არჩევნების დღეს ორგანიზებას გაუწევს საზღვარგარეთ გახსნილ საარჩევნო უბნებზე ხმის მიცემის პროცესს“,- ნათქვამია განცხადებაში.

„საქართველოს ხალხთა მსოფლიო კონგრესი“ მიიჩნევს, რომ უმჯობესი იქნებოდა, თუ ქართული ოპოზიცია 2012 წლის საპარლამენტო არჩევნებზე ხელისუფლებას ერთიანი ფრონტით დაუპირისპირდებოდა.

„ცალკეულმა პოლიტიკურმა პარტიებმა განაცხადეს, რომ ითანამშრომლებენ მხოლოდ პრო-ამერიკული შეხედულებების მქონე სუბიექტებთან, რის გამოც ოპოზიციის ერთობა ვერ შედგა“,- ნათქვამია განცხადებაში.

Internet.ge