საქართველოს პრეზიდენტის მიხეილ სააკაშვილის განცხადებით, გარკვეული ძალები ცდილობენ, საქართველოს არჩევნები  არა ქართველი ხალხის, არამედ ქურდების სხადნიაკის მიერ გადაწყდეს.  აღნიშნული განცხადება სააკაშვილმა გორში ამომრჩეველთან შეხვედრისას გააკეთა.

მისი თქმით, იმ ყველაფრის ფონზე, რაც ტელევიზიების მეშვეობით ვრცელდება, ქართველი ხალხის არჩევანი თავისუფლებაა.

„ამ ყველაფრის ფონზე გისვამთ მთავარ კითხვას, რომელზეც ყველამ ერთად უნდა გამცეთ პასუხი. არის თუ არა დღეს  საქართველო უკეთესი ქვეყანა, ვიდრე იყო 8 წლის წინ... და თუ არის, რაც თქვენი ოვაციით გამოხატეთ, მოდით  ნურავის მივცემთ საშუალებას საქართველო დააბრუნოს უკან. ის, რაც 2008 წელს ამ მოედანზე ჩვენმა მტერმა ვერ მოახერხა, პირველ ოქტომბერს იგივეს ვიტყვით და სწორ არჩევანს გავაკეთებთ“,- განაცხადა სააკაშვილმა.

სიტყვით გამოსვლისას მიხეილ სააკაშვილმა ოპოზიციურ სპექტრს გაერთიანებისკენ კიდევ ერთხელ მოუწოდა.

„ჩვენ არავის განვიხილავთ შიდა მტრად, ყველა პარტია უნდა გაერთიანდეს. არის თემები რომლებზეც სპეკულირება არ შეიძლება. ერთი რამ ყველამ უნდა ვთქვათ, არავინ უნდა შეაჩეროს აღმშენებლობის პროცესი, ჩვენ უნდა გავაგრძელოთ ის, რაც ყველამ ერთად დავიწყეთ. არ უნდა შევაჩეროთ ჩვენი შვილებისთვის განათლების გაუმჯობესება, იმიტომ რომ ჩვენ ყველას გვჭირდება ჯანსაღი თაობა. არ უნდა შეჩერდეს ახალი საავადმყოფოების მშენებლობა და დაზღვევა, რადგან ეს ყველა ადამიანის ინტერესებშია, როგორი პოლიტიკური მრწამსისაც არ უნდა იყოს. რაც მთავარია, ჩვენ არავითარ შემთხვევაში არ უნდა დავაბრუნოთ უკან კანონიერი ქურდები და ორგანიზებული დანაშაული იმიტომ, რომ ეს ყოველგვარი პარტიული ინტერესების იქით მიდის“,- დასძინა სააკაშვილმა.

მისივე განმარტებით, საქართველო გარე მტერს არასდროს დაუწვება.

„ვერანაირი მათი ტანკები, აქიდან რამდენიმე კილომეტრში ვერ შეაჩერებს ქართველი ერის ურყევ ნებას, რომ იყოს თავისუფალი“,- განაცხადა ქვეყნის პირველმა პირმა.

Internet.ge