„ერთიანი ნაციონალური მოძრაობის" შემაჯამებელ ყრილობაზე შეკრებილებს ქალაქის მერმა გიგი უგულავამაც მიმართა. უგულავა ქართველ ხალხს მოუწოდებს, საკუთარი ნაჭუჭიდან გამოვიდნენ და დარწმუნდნენ, რომ ორი სიმართლე არ არსებობს და არ დაუშვან საქართველოს წარსულში დაბრუნება.

ეროვნულ სტადიონზე „ნაციონალური მოძრაობის“ ყრილობაზე სიტყვით გამოსვლისას უგულავამ ყურადღება სამთავრობო პროგრამაზე გაამახვილა და განაცხადა, რომ  ჯანდაცვის სისტემასთან დაკავშირებით, ყოველდღე უამრავ წერილს ეცნობა.

მისი თქმით, მთავრობის საზრუნავია, რომ ახალი საავადმყოფოები არ გადაიქცეს მუზეუმებად, ხოლო მოქალაქეთა დაზღვევა ფარატინა ფურცლად.

„ჩვენი მიზანია, საქართველოს თითოეულმა მოქალაქემ ჯანდაცვის ხელმისაწვდომი პროგრამებით ისაგრებლოს,“-დასძინა უგულავამ.

ამასთან, დედაქალაქის მერმა გამოსვლისას პატიმრების წამებაზეც ისაუბრა და განაცხადა, რომ საზოგადოებამ ძალადობის საშინელი და შემზარავი ფაქტები იხილა, რომელმაც ყველას წარსული გაახსენა, ის დრო, როდესაც ძალადობა ქუჩაში ხდებოდა.

„ყველა დაზარალებულს გულწრფელად ვუთანაგრძნობ, სისტემური მარცხი უნდა ვაქციოთ კათარზისად და ციხეში არსდროს უნდა მოხდეს ძალადობა, ხალხმა არ უნდა დაუშვას წარსულში დაბრუნება,“-განაცხადა გიგი უგულავამ.

 Internet.ge