„ერთიანი ნაციონალური მოძრაობის“ სიის პირველი ნომრის დავით ბაქრაძის
განცხადებით, ძლიერ ქვეყანას ძლიერი ოჯახი წარმოშობს.
აღნიშნული განცხადება პარლამენტის თავმჯდომარემ საქართველოს ეროვნულ
სტადიონზე მიმდინარე პარტიულ ყრილობაზე სიტყვით გამოსვლისას გააკეთა.
ბაქრაძე 1-ელ ოქტომბერს დანიშნულ არჩევნებსაც შეეხო და აღნიშნა, რომ
სწორედ სამ დღეში გადაწყდება საით წავა ქვეყანა.
„სამ დღეში გადაწყდება, თუ საით წავა ჩვენი ქვეყანა, 1-ელ ოქტომბერს
თქვენ ქვეყნისთვის სასიკეთო არჩევანი უნდა გააკეთოთ. ჩვენ მომდევნო ოთხი წლის
განმავლობაში უნდა გამოვასწოროთ ის პრობლემები, რომელიც ქვეყანაში არსებობს. საქართველოში ჯერ კიდევ
ბევრია გასაკეთებელი, ძალიან ბევრი
გაჭირვებულია, ხდება უფლებების დარღვევა, ჩვენი ვალი კი არის აღმოვფხვრათ
ეს ყველაფერი და მომდევნო 4 წლის განმავლობაში მივაღწიოთ იმას, რომ ჩვენი ქვეყანა
უკეთესი იყოს“,- განაცხადა დავით ბაქრაძემ.
მისი თქმით, თითოეული ადამიანის მხარდაჭერა ვალად დაედება მმართველ
გუნდს, რომელიც 24 საათიანი მუშაობით უნდა გადაუხადოს ხალხს.
„ეს ვალი 24 საათიანი შრომოთ და მეტი სარგებლის მოტანით უნდა
გადაგიხადოთ. ყოველდღე თითოეულ თქვენთაგანს ერთით ნაკლები პრობლემა უნდა ჰქონდეს.
ძლიერი ქვეყნისთვის კი ძლიერი ოჯახებია საჭირო. ამისთვის ჩვენ მთავარი პრობლემა - უმუშევრობა უნდა აღმოვფხვრათ, როგორც ბოლო მოვუღეთ კრიმინალს“,- განმარტა ბაქრაძემ
და აქვე დასძინა, რომ ქვეყანაში ერთ-ერთ მთავარ პრობლემად უმუშევრობასთან ერთად
კომუნალური გადასახადები რჩება.
internet.ge
