"ქართული ოცნების" ლიდერი ბიძინა ივანიშვილი კოალიციის აქტივისტებს, აქციების შეწყვეტისკენ მოუწოდებს.

“როგორც წესი, ოპოზიცია გამოდის ქუჩებში აქციით.  დღეს ჩვენ ოპოზიციაში აღარ ვართ, ხელისუფლებას წარმოვადგენთ და ჩემი თხოვნა და მოწოდებაა ყოველგვარი აქციები შევწყვიტოთ, გადავინაცვლოთ შენობებში, სასამართლოში, პარლამენტში და ყველა გაუგებრობა იქ გადავწყვიტოთ", - განაცხადა ბიძინა ივანიშვილმა.

ამასთან, როგორც ივანიშვილმა ჟურნალისტებს განუცხადა, ხელისუფლების გადაბარება  "ლამაზად“ უნდა მოხდეს.

"ღელავს ევროპა - ამერიკა. ამიტომაც ჩვენ აღარ გვეკადრება ქუჩის აქციები ჩვენ უკვე ხელისუფლებაში ვართ და მაქსიმუმ თვის ბოლომდე სჭირდება დრო, რომ ტექნიკური პროცედურები დასრულდეს და ხელისუფლება ოფიციალურად გადავიფორმოთ“,- დასძინა ივანიშვილმა.

შეგახსენებთ, რომ გუშინ, მთელი დღის განმავლობაში "ქართული ოცნების" მხარდამჭერები შეკრებილები იყვნენ სხვადასხვა საოლქო კომისიასთან და კომისიის წევრების გადაწყვეტილებებს აპროტესტებდნენ. იყო რამდენიმე უბნის პიკეტირების მცდელობა.

internet.ge