"რესპუბლიკური პარტიის" პრესსამსახურის ინფორმაციით, "რესპუბლიკური პარტიის" და კოალიცია „ქართული ოცნების“ ერთ-ერთმა ლიდერმა, თინათინ ხიდაშელმა, ამერიკის შეერთებულ შტატებში ვიზიტის ფარგლებში, პირველი შეხვედრა ამერიკის სახელმწიფო დეპარტამენტში - ტომას მელიასთან გამართა.

შეხვედრაზე საუბარი იყო წინასაარჩევნო გარემოსა და ქვეყანაში მიმდინარე პოლიტიკურ პროცესებზე. შეხვედრის დროს ყურადღება გამახვილდა მედიის პრობლემებსა და კოალიცია „ქართული ოცნების“ აქტივისტების წინააღმდეგ განხორციელებულ ქმედებებზე.

"რესპუბლიკური პარტიის" პრესსამსახურის ინფორმაციით, ბატონი მელია დაინტერესდა კონტროლის პალატის მიერ განხორციელებული ქმედებებით და რეგიონებში „ქართული ოცნების“ საქმიანობით. შეხვედრაზე განსაკუთრებით დიდი დრო „ქართული ოცნების“ სამოქმედო სტრატეგიას და გამარჯვების მოპოვებისთვის დაგეგმილ საარჩევნო კამპანიას შეეხო.

თინათინ ხიდაშელი:  „მათი კითხვები კონკრეტულად იმ პრობლემებს შეეხო, რომელიც მათ მისცემს შესაძლებლობას სწრაფად გაერკვნენ საარჩევნო პროცესის მიმდინარეობაში, თუ რა კონკურენტული და სამართლიანი პროცესი მიდის მედიის, სარეკლამო ბაზრის ხელმისაწვდომობისა და აქტივისტების მიერ საარჩევნო კამპანიის თავისუფლად ჩატარების მონიტორინგის მიმართულებით.

ჩვენ მივიღეთ ინფორმაცია ყველა იმ რეკომენდაციის შესახებ, რომელსაც ამერიკული მხარე უწევს საქართველოს ხელისუფლებას საქართველო ამერიკის ქარტიის ფარგლებში, დემოკრატიული პროცესების განვითარებისა და სამართლიანი და კონკურენტული არჩევნების მისაღწევად."

თინათინ ხიდაშელი აშშ სახელმწიფო დეპარტამენტის ადამიანის უფლებათა დაცვის ყოველწლიური ანგარიშის მომზადების სამსახურის წარმომადენლებსაც შეხვდა.

ხიდაშელის განცხადებით, სახელმწიფო მდივნის საქართველოში დაგეგმილი ვიზიტის წინ, შეხვედრები სახელმწიფო დეპარტამენტში განსაკუთებით მნიშვნელოვანია, ვინაიდან იქმნება შესაძლებლობა ქალბატონ ქლინტონს დეტალური ინფორმაცია მიეწოდოს საქართველოს ხელისუფლებასთან მოლაპარაკებებისთვის.

Internet.ge