საქართველოს ვიცე პრემიერ-მინისტრი გიორგი ბარამიძე აგრძელებს სამუშაო ვიზიტს უკრაინაში, სადაც მონაწილეობს კიევის მე-5-ე საერთაშორისო უსაფრთხოების ფორუმში.

გიორგი ბარამიძე სიტყვით გამოვიდა სესიაზე: “შავი ზღვის რეგიონის მილიტარიზაცია“, სადაც ყურადღება გაამახვილა შავი ზღვისა და აღმოსავლეთ ევროპის რეგიონის უსაფრთხოების პრობლემებსა და გამოწვევებზე, საქართველოსათვის მნიშვნელოვან უსაფრთხოების საკითხებზე, ნატო-საქართველოს ურთიერთობებსა და საქართველოში მიმდინარე და წარმატებით განხორციელებულ რეფორმებზე.

ფორუმის მუშაობაში მონაწილეობას იღებენ ჩეხეთის, საფრანგეთის, ლიტვის, უკრიანის, რუმინეთის, თურქეთისა და სხვა ქვეყნების აღმასრულებელი და საკანონმდებლო ხელისუფლების მაღალი რანგისა და საერთაშორისო არასამთავრობო ორგანიზაციების წამომადგენლები.

ვიზიტის ფარგლებში, გიორგი ბარამიძე საპატიო სტუმრის სტატუსით უკრაინის სახელმწიფო მოხელეთა მომზადების აკადემიაში მიიწვიეს, სადაც შედგა ტელეხიდი აკადემიის ფილიალებთან ოდესაში, დნეპროპეტროვსკსა და ლვოვში. შეხვედრაზე დიდი ინტერესით მოისმინეს ყველა იმ რეფორმის შესახებ, რაც განხორციელდა საქართველოში განათლების, ჯანდაცვის, სამართლებრივ და სხვა სფეროებში, ასევე კორუფციასთან ბრძოლის კუთხით.

„ასეთი სახის შეხვედრები ხელს უწყობს საქართველოსა და უკრაინას შორის ურთიერთობების გაღრმავებას ყველა დონეზე, რაც აძლიერებს საქართველოს ავტორიტეტს  და ინტერესს ქვეყანაში ტურიზმის განვითარებისა და ინვესტიციების მოზიდვისათვის და საბოლოოდ ორ ქვეყანას შორის როგორც  ეკონომიკურ, ასევე პოლიტიკურ ურთიერთობებს განამტკიცებს“,- აცხადებენ ვიცე პრემიერ-მინისტრის აპარატში.

Internet.ge