ეკონომიკისა და მდგრადი განვითარების მინისტრის ვერა ქობალიას შეფასებით, მსოფლიო მასშტაბით, ყველა ინვესტორისთვის საქართველოში დონალდ ტრამპის ჩამოსვლით მწვანე შუქი აინთო.

როგორც თბილისის საერთაშორისო აეროპორტში, მინისტრმა ჟურნალისტებთან საუბრისას განაცხადა, აჭარაში „ტრამპ თაუერის“ მშენებლობა, საქართველოს ეკონომიკის განვითარებას შეუწყობს ხელს.

„ტრამპის ჩამოსვლა საქართველოში დღეს მწვანე შუქია ყველა ინვესტორისთვის მსოფლიო მასშტაბით, რომ საქართველო გახსნილია ინვესტიციებისთვის. „ტრამპ თაუერის“ ბათუმში მშენებლობა კი, ხელს შეუწყობს საქართველოს ეკონომიკის განვითარებას არა მარტო აჭარაში, არამედ მთელი საქართველოს მასშტაბით. ასევე ხელს შეუწყობს ყველა სექტორის განვითარებას, მაგალითად სოფლის მეურნეობას, რადგან ამ სასტუმროში შემდომ საჭირო იქნება როგორც საკვები პროდუქტები ასევე, ტურისტებისთვის ტრანპსოტი და სხვა საშუალებები. ამიტომ ეს მთელი საქართველოსთვის მნიშვნელოვანი პროექტია“,- განაცხადა ქობალიამ

დონალდ ტრამპი კი, უკვე საქართველოში ჩამოვიდა, მას ვერა ქობალია და „სილქროუდ ჯგუფის“ წარმომადგენლები დახვდნენ.

ბიზნესმენი დღეს, თბილისში დარჩება, ხვალ კი, ბათუმში გაემგზავრება, სადაც მედიის წარმომადგენელებისთვის პრესკონფერენციას გამართავს.

დონალდ ტრამპი საქართველოში ორდღიანი ვიზიტის ფარგლებში, საქართველოს პრეზიდენტს მიხეილ სააკაშვილს შეხვდება.

ბათუმში, ბიზნესმენი "ტრამპ თაუერის" მშენებლობის პროექტის პრეზენტაციასაც დაესწრება. მისი ინვესტიციით, თბილისსა და ბათუმში საცხოვრებელი კომპლექსი და სასტუმრო უნდა აშენდეს.

Internet.ge