ექსპერტ რამაზ საყვარელიძის შეფასებით, ის ფაქტი, რომ პარტია „ქართული ოცნება-დემოკრატიული საქართველოს“ თავმჯდომარედ მანანა კობახიძე აირჩიეს და არა ეკატერინა ხვედელიძე, იმაზე მეტყველებს, რომ ივანიშვილის მეუღლეს ქართული სინამდვილის ცოდნა და საჭირო კონტაქტები არ აქვს.

ექსპერტის შეფასებით, აღნიშნული ფაქტი იმითაა გამოწვეული, რომ ივანიშვილის ოჯახი საქართველოში, წლების განმავლობაში არ ცხოვრობდა.  

როგორც „ინტერნეტ.ჯი“-ს საყვარელიძემ განუცხადა, ის ფაქტი, რომ ივანიშვილის პარტიამ, ისეთი პროგრამა წარმოადგინა, სადაც ზოგიერთი საკითხი უკვე ნაციონალური მოძრაობის მიერაა დასმული, იმით აიხსნება, რომ საარჩევნოდ ყველა პარტიას თითქმის ერთნაირი შეთავაზებები ექნებათ.

ექსპერტის თქმით, ამგვარი დამთხვევები ცხოვრებისეული მოთხოვნების გამო ხდება.

ბიძინა ივანიშვილმა დღეს, ყრილობაზე საზოგადოებას სიტყვით მიმართა და პარტიის ამოცანებსა და მიზნებზე ისაუბრა.

ბიზნესმენის თქმით, ისინი მოქალაქეებს, ხელისუფლებაში მოსვლის შემდეგ, დაზღვევას სთავაზობენ. ასევე, ივანიშვილის განცხადებით, ომის შედეგად დევნილ მოქალაქეებზე ხელისუფლების ზრუნვა მთავარ მიზანს უნდა წარმოადგენდეს.

როგორც ივანიშვილმა განაცხადა, პარტია „ქართული ოცნება-დემოკრატიული საქართველოს“  ერთ-ერთი მიზანი არჩევნების გზით ხელისუფლების შეცვლაა.

Internet.ge