ბიძინა ივანიშვილის პრესსპიკერის მაია ფანჯიკიძის განცხადებით, იმ შემთხვევაში, თუ კონსტიტუციაში ცვლილებები შევა და ევროკავშირის მოქალაქეებს შეეძლებათ არჩევნებში მონაწილეობის მიღება, მაშინ ისინი ამ უფლებას გამოიყენებენ.

როგორც მაია ფანჯიკიძემ დღეს გამართულ პრესკონფერენციაზე განაცხადა, მათ აქვთ ეჭვები იმასთან დაკავშირებით, რომ ცვლილებები არ დამტკიცდება.

„თუ კონსტიტუციაში ცვლილებები არ დამტკიცდება ბიძინა ივანიშვილი კოალიციის საარჩევნო სიაში არ იქნება, მაგრამ მას შემდეგ, რაც მას მოქალაქეობა აღუდგება, ივანიშვილი ყველა იმ ქმედებას განახორციელებს, რომლის უფლებაც მას ექნება“,- განაცხადა ფანჯიკიძემ.

შეგახსენებთ, რომ  „ქრისტიან-დემოკრატების“ ლიდერმა, გიორგი თარგამაძემ საკონსტიტუციო ცვლილებების პროექტი, რომელიც საქართველოს მოქალაქეობის საკითხს ეხება, პარლამენტის იურიდიულ საკითხთა კომიტეტსა და საყოველთაო–სახალხო განხილვის კომისიას გადაუგზავნა.

თარგამაძის განცხადებით, კონსტიტუციის 49–ე მუხლში ცვლილებები უნდა შევიდეს, რომლის მიხედვით,  პარლამენტის წევრად შეიძლება აირჩეს – საარჩევნო უფლების მქონე საქართველოს მოქალაქე, 21 წლის ასაკიდან, აგრეთვე 21 წელს მიღწეული პირი, რომელიც დაბადებულია და ბოლო ათი წლის განმავლობაში ცხოვრობს საქართველოში და აქვს ევროკავშირის წევრი სახელმწიფოს მოქალაქეობა.

Internet.ge