ბიძინა ივანიშვილის პრესსპიკერის, მაია ფანჯიკიძის განცხადებით, ჯერ-ჯერობით, მათ მიერ დაანონსებული აქციის გამართვის ზუსტი თარიღი და დრო ცნობილი არ არის.

ამის შესახებ განცხადება, ფანჯიკიძემ დღეს გამართულ პრესკონფერენციაზე გააკეთა.

მისი თქმით, აქციები დაახლოებით 26 ან 27 მაისს ჩატარდება, აღნიშნულთან დაკავშირებით კი მათ განცხადება შესაბამის უწყებებში უკვე შეტანილი აქვთ და ამჟამად პასუხს ელოდებიან.

„ჩვენ გვინდა, აქცია 26 მაისს გავმართოთ, მაგრამ თუ ამის უფლებას არ მოგვცემენ, 27 მაისს ჩავატარებთ. ასევე ჩვენი სურვილია შეკრება ბორის პაიჭაძის სახელობის სტადიონზე მოხდეს, მაგრამ თუ ამის უფლებასაც ვერ მივიღებთ, მაშინ მეორე ვესიად მიხეილ მესხის სახელობის სტადიონს განვიხილავთ“, - განაცხადა ფანჯიკიძემ.

ივანიშვილის პრესსპიკერის განცხადებით, აქციის 26 მაისს გამართვა შემთხვევითი არ არის და სწორედ ამ დღეს, პარტია საარჩევნო კამპანიას იწყებს.

კითხვაზე, დაუკავშირდება თუ არა „სახალხო კრებისა“ და მათი აქცია ერთმანეთს, ფანჯიკიძემ განაცხადა, რომ ამასთან დაკავშირებით ჯერ-ჯერობით არანაირი მოლაპარაკება არ მიმდინარეობს. მისი ინფორმაციით, აღნიშნულ საკითხზე შემოთავაზება არ ყოფილა.

„ვიცი, რომ 26 მაისს „სახალხო კრებაც“ გეგმავს აქციას, თუმცა დაუკავშირდება თუ არა ეს ორი აქცია ერთმანეთს ვერ გეტყვით. შემოთავაზება თუ იქნება, ჩვენ მას განვიხილავთ“,- განაცხადა ფანჯიკიძემ.

ივანიშვილის პრესსიკერის განცხადებით, მათ მიერ დაგეგმილი შეკრება საპროტესტო აქცია არ არის, არამედ ისინი საარჩევნო კამპანიას იწყებენ. „ჩვენ ამ შეკრებას ფართომაშტაბიანი შეხვედრაც შეგვიძლია დავარქვათ“,- დასძინა ფანჯიკიძემ.

internet.ge