აზერბაიჯანი პირველად გახდა გაეროს უშიშროების საბჭოს თავმჯდომარე ქვეყანა. როგორც აზერბაიჯანული მედია გაეროს საინფორმაციო ცენტრზე დაყრდნობით იუწყება, უკვე მაისში, გაეროს უშიშროების საბჭოს სხდომაზე, განხილვის თემა ახლო აღმოსავლეთში არსებული ვითარება და ბირთვული იარაღის გაუვრცელებლობის საკითხი იქნება.

 სავარაუდოდ, მაისშივე ჩატარდება ტერორიზმის წინააღმდეგ ბრძოლასთან დაკავშირებული მაღალი რანგის ღია სხდომაც, რომელშიც, შესაძლოა, აზერბაიჯანის პრეზიდენტმა ილჰამ ალიევმაც მიიღოს მონაწილეობა.

გაეროს რადიოსთვის მიცემულ ინტერვიუში აზერბაიჯანის მუდმივმა წარმომადგენელმა ამ საერთაშორისო ორგანიზაციაში აგშინ მეტხიევმა განაცხადა, რომ საბჭოს მუშაობის მაისის პროგრამა ჯერ ბოლომდე შეთანხმებული არ არის, მაგრამ უკვე ცხადია, რომ ძირითადი ყურადღება კონცენტრირებული იქნება ახლო აღმოსავლეთის პრობლემატიკასა და საერთაშორისო ტერორიზმთან ბრძოლაზე, ბალკანეთში ასრებულ ვითარებაზე და სირიის კრიზისის დარეგულირებაზე.

ირანის პრობლემატიკასთან დაკავშირებული საკითხების განხილვა მაისის პროგრამაში, ჯერ-ჯერობით, არ ფიგურირებს.